काराकस । भेनेजुएलाका राष्ट्रपति निकोलस मदुरोले अमेरिकी साम्राज्यवादको पतन भएको बताउनुभएको छ ।
अर्जेन्टिनाको एउटा सञ्चार माध्यसँगको अन्तर्वार्तामा उहाँले ल्याटिन अमेरिका, क्यारेबियन र बाँकी विश्वमा अमेरिकी वर्चस्व घट्दै गएको बताउनुभएको हो ।
‘अमेरिकी साम्राज्यवाद पतन उन्मुख छ । अब ल्याटिन अमेरिका र क्यारेबियनका जनताको भलाइको लागि प्रस्ताव गर्न केही छैन । सबै अमेरिकी नीति पश्चगामी छन्’ राष्ट्रपति मादुरोले भन्नुभयो । यद्यपि ह्वाइट हाउसद्वारा प्रवर्तित अतिदक्षिण समूहहरूको अझै पनि प्रभाव रहेको उहाँले स्वीकार गर्नुभयो ।
अमेरिकाले ल्याटिन अमेरिकी समाजमा असहिष्णुता र घृणा उत्पन्न गराउन, लोकतन्त्र विरोधी, अधिनायकवादी, बहिष्करणका परियोजनालाई वित्तीय सहयोग गर्न चाहेको आरोप भेनेजुएलाका राष्ट्रपतिले लगाउनुभयो ।
उहाँले कठिन परिस्थितिमा पनि बहुधु्रवीय, बहुकेन्द्रित, नयाँ संसार, मानवताको साझा भाग्य निर्माणमा आफ्नो देशले योगदान गरेको बताउनुभयो ।
अमेरिकी साम्राज्यवादी आफू र आफ्नो देशका क्रान्तिकारी परियोजनालाई नष्ट गर्न उद्यत रहेको दाबीसमेत गर्नुभयो । (रासस/सिन्ह्वा)
