पुष्कर भट्ट, महेन्द्रनगर ।
राष्ट्रिय जनमोर्चा कञ्चनपुरले फागुन महिनाभर संगठनात्मक अभियान सञ्चालन गर्ने तयारी गरेको छ । सोमबार बसेको राजमो जिल्ला समितिको विस्तारित बैठकले सांगठनिक योजना बनाएको हो ।
राजमोका जिल्ला अध्यक्ष रामबहादुर कार्कीको अध्यक्षता तथा केन्द्रीय सदस्य एवं सुदूरपश्चिम प्रदेश इन्चार्ज मनोज भट्टको प्रमुअ आतिथ्यतामा विस्तारित बैठक सम्पन्न भएको थियो ।
बैठकमा राजमो केन्द्रीय सदस्य लोकेन्द्र लम्साल, तराई–मधेश जनवादी मोर्चाका महासचिव राजाराम चौधरी, अखिल (छैठौं) महासचिव महेशराज जोशी, जातीय समता समाजका महासचिव गोविन्द विक, नेकपा (मसाल) कञ्चनपुर जिल्ला प्रवक्ता लक्ष्मीदत्त बडु, अखिल नेपाल ट्रेड युनियन महासंघ (अन्टुक)का केन्द्रीय सदस्य कमल साहु, अखिल नेपाल महिला संघकी जिल्ला अध्यक्ष कमला चौधरी, रक्तिम साँस्कृतिक अभियानका कञ्चनपुर जिल्ला अध्यक्ष ललित चन्दले सम्बोधन गर्नुभएको थियो ।
राजमो जिल्ला उपाध्यक्ष मन्जु परियारको सञ्चालनबाट अगाडि बढेको कार्यक्रममा जिल्ला सहसचिव लालबहादुर कुँवरले स्वागत गर्नुभएको थियो ।
अभियानलाई तिब्रता दिन विभिन्न समिति गठन गरिएको छ । रामबहादुर कार्कीको संयोजकत्वमा ७ सदस्यीय अभियान परिचालन समिति गठन भएको छ भने लालबहादुर कुँवरको संयोजकत्वमा ५ सदस्यीय परिचालन उपसमिति र नौ वटै स्थानीय तहमा संगठन निर्माण गर्ने गरी सचिव अभिमान थापाको संयोजकत्वमा परिचालन समिति गठन गरिएको छ ।
कार्यक्रममा जिल्ला अध्यक्ष राम बहादुर कार्कीले सांगठनिक प्रस्ताव प्रस्तुत गर्नुभएको थियो । अभियानको उद्घाटन अगामी फागुन १ गते कृष्णपुरमा हुनेछ ।
