बागलुङ बजार । राष्ट्रिय जनमोर्चा बागलुङको सातौँ सम्मेलनले १९ बुँदे समसामयिक प्रस्ताव पारित गरेको छ ।
जिल्ला अध्यक्ष राजेन्द्र ढुङ्गानाको हस्ताक्षरमा २०७९ फागुन २२ गते जारी प्रेसविज्ञप्तिमा सो जानकारी दिइएको हो ।
फागुन १९ देखि २१ गतेसम्म सम्पन्न उक्त सम्मेलनमा सचिव भीमलाल पोखरेलले बन्दशत्रमा सो प्रस्ताव प्रस्तुत गरी पारित गरिएको विज्ञप्तिमा उल्लेख छ ।
यस्तो छ, १९ बुँदे समसामयिक प्रस्ताव :
“१. प्रतिगामी कोणबाट आएका चलखेललाई निरुत्साहित पार्दै संविधानका सकारात्मक उपलब्धिको रक्षामा जोड दिन्छ ।
२. राष्ट्रिय स्वाधीनता, सार्वभौमिकता, राष्ट्रिय अखण्डता र धर्म निरपेक्षताको रक्षा गर्नुपर्नेमा जोड दिन्छ ।
३. सङ्घीयताको खारेजी गरी प्रजातान्त्रिक विकेन्द्रीयतामा आधारित स्थानीय स्वशासनसहितको एकात्मक राज्यप्रणाली लागु गर्नुपर्नेमा जोड दिन्छ ।
४. जनताको दैनिक उपभोग्य बस्तुमा भएको मूल्यवृद्धि र करवृद्धिको नियन्त्रण, कालाबजारी, घुसखोरी र अराजकताको अन्त्य गर्नुपर्नेमा जोड दिन्छ ।
५. सत्ताको दुरूपयोग, अपराधीलाई राजनीतिक संरक्षण र स्थानीय तहको अराजकता अन्त्यका लागि जोड दिन्छ ।
६. स्थानीय स्वायत्त शासनलाई मौलिक अधिकारको मान्यता दिई स्थानीय तहका अधिकार र विकास बजेट वृद्धि हुनुपर्नेमा जोड दिन्छ ।
७. अपर कर्णाली, पश्चिम सेतीलगायतका राष्ट्रघाती सम्झौता र भारतसँग गरिएको सन् १९५० लगायतका असमान सन्धिसम्झौता खारेजीका लागि सरकारले कूटनीितक पहल सुरु गर्नुपर्नेमा जोड दिन्छ ।
८. विकेन्द्रित र सन्तुलित विकास निर्माण, उत्पादनमूलक उद्यम र जनताको जीवनमा सकारात्मक परिवर्तन गराउने कार्ययोजना लागु गर्नुपर्नेमा जोड दिन्छ ।
९. राष्ट्रघाती नागरिकता विधेयकमा भएको खुकुलो नीति खारेज गरी गैरनेपालीलाई उपलब्ध गराएको नागरिकता खारेज गरिनुपर्नेमा जोड दिन्छ ।
१०. साम्राज्यवादी शक्तिबाट देशको सार्वभौमिकतामाथि हस्तक्षेप गर्ने गरी पारित गरिएका एमसिसीलगायतका सन्धिसम्झौताको खारेजीमा जोड दिन्छ ।
११. देशको राजनीतिक अस्थिरतामाथि फाइदा उठाउँदै राजावादी तथा अराजकतावादीले ठाउको उठाउन खोज्नु दुर्भाग्य हो । त्यस प्रकारका प्रतिगामी तत्त्वको व्यापक भण्डाफोर गर्दछ ।
१२. देशमा वित्तीय सुशासन नहुँदा आर्थिक मन्दीको अवस्था सृजना भएको छ । यसलाई रोक्न राष्ट्रिय पुँजीको विकासमा जोड दिँदै अर्थतन्त्रमा सुधार गर्नुपर्नेमा जोड दिन्छ ।
१३. लघुवित्तीय संस्था र बैङ्कको मनोमानीका कारण कैयौँ नागरिक अप्ठ्यारोमा परेका छन् । लघुवित्तीय संस्था र बैङ्कको उच्च व्याज र दोहनलाई तत्काल नियमन गरी नागरिकमाथि लादिएको वित्तीय आतङ्क तत्काल रोकिनुपर्दछ ।
१४. बागलुङ जिल्लाको मध्यभाग भएर जाने मध्यपहाडी लोकमार्ग, दक्षिणभेगको कालिगण्डकी कोरिडोर र मालढुङ्गा कुश्मीसेरा बरेङ मोटरबाटोको निर्माण कार्य द्रुत गति सम्पन्न गर्नुपर्नेमा जोड दिन्छ ।
१५. ग्रामीण पर्यटनको विकासका लागि बागलुङ जिल्लाका विभिन्न पर्यटकीय स्थानको पहिचान, बजेट व्यवस्थापन र प्रचार प्रसार साथै पर्यटन पूर्वाधार निर्माणमा जोड दिन्छ ।
१६. जिल्लाव्यापी रूपमा बिद्युतीकरणको विशेष कार्यक्रम बनाउनुपर्नेमा जोड दिदैं उत्तरगङ्गा जलासययुक्त बिद्युत योजना बागलुङ जिल्लाकै भूभागमा पर्ने गरी र कालिगण्डकी जलविद्युत बी आयोजनालाई पनि नेपाल सरकारकै लगानीमा तत्काल निर्माण गर्नुपर्नेमा जोड दिन्छ ।
१७. चीनसँगको व्यापारिक सम्बन्ध विस्तार गर्दा मुस्ताङको कोरला नाकासहितका विभिन्न स्थानबाट व्यापारिक नाका खोल्नुपर्नेमा जोड दिन्छ ।
१८. ढोरपाटन सिकार आरक्षको मध्यवर्ती क्षेत्रका बासिन्दालाई प्रतिकूल नहुने गरी त्यस क्षेत्रका नागरिकको माग पूरा गर्नुपर्नेमा जोड दिन्छ ।
१९. बोलपत्र स्वीकृत भई शिक्षा, स्वास्थ्य, खानेपानी, मोटरबाटोलगायतका कैयौँ पूर्वाधार निर्माणमा निर्माण व्यवसायीको लापरवाही र सरकारले उचित बजेट विनियोजन नगर्दा अलपत्र अवस्थामा पुगेका योजना तत्काल सम्पन्न गर्नुपर्ने र लापरवाही भएको पहिचान गरी कडा कारबाही गर्नुपर्नेमा जोड दिन्छ ।”
