खिमराज चालिसे, चण्डीगढ (भारत)।
मूल प्रवाह अखिल भारत नेपाली एकता समाज, सुदूर पश्चिमोत्तर क्षेत्रीय समितीको दसौँ क्षेत्रीय सम्मेलन तयारीको लागि विस्तारित वैठक पंजाबको बठिन्डामा सम्पन्न भएको छ ।

मार्च ५, २०२३ आइतबारका दिन सम्पन्न भएको सो विस्तारित बैठकले आगामी २९–३० अप्रैल २०२३ मा दसौँ क्षेत्रीय सम्मेलन गर्ने निर्णयसहित अध्यक्ष प्रेम सापकोटाको संयोजकत्वमा २५१ सदस्यीय सम्मेलन तयारी समिति गठन गरेको हो।

“प्रवासी नेपालीहरूको मताधिकार र समानुपातिक प्रतिनिधित्वका लागि सङ्घर्ष गरौँ, “भारतस्थित नेपालीहरूको सामाजिक सुरक्षाको लागि सङ्गठित बनौँ” भन्ने नाराका साथ मूल प्रवाहले भारतव्यापी रूपमा २२ अप्रैलदेखि ७ मे २०२३ सम्म क्षेत्रीय सम्मेलन गर्ने निर्णयअन्तर्गत सुदूर पश्चिमोत्तरको क्षेत्रीय विस्तारित बैठक सम्पन्न भएको आयोजकले जनाएको छ ।

मूल प्रवाहका केन्द्रीय अध्यक्ष ठाकुर खनालले विस्तारित बैठक मैनबत्ती बालेर गरी उदघाटन गर्नुभएको हो । उद्घाटन भाषणमा खनालले मूल प्रवाह एकता समाजले रोजीरोटीको खोजीमा भारत पसेका लाखौँ नेपालीहरूको हकहितको रक्षा गरिरहेको बताउनुभयो ।

उहाँले भारतस्थित नेपालीहरूलाई स्वदेशसँग जोड्दै पुल बनेर राष्ट्रियता, धर्म निरपेक्षता तथा गणतन्त्रको रक्षाको पक्षमा सङ्घर्ष गरेको गौरवमय इतिहास रहेको धारणा राख्नुभयो ।

अध्यक्ष खनालले थप्नुभयो– सङ्घीयता, एमसिसी र एसपिपी विरुद्धको सङ्घर्षमा पनि मूल प्रवाहले अहम् भूमिका निर्वाह गरिरहेको उहाँको भनाइ थियो ।

विस्तारित बैठकमा मूल प्रवाहका केन्द्रीय उपाध्यक्ष कपिल खनाल, महिला सुदूर पश्चिमोत्तर क्षेत्रीय विभागकी खगी थापा, विद्यार्थी सङ्घबाट अधिवक्ता माधव पोख्रेल, रक्तिम विभागका बिलबहादुर गुरुङ, समता विभागका हुमबहादुर विक, जनजाति विभागका तेजबहादुर रोकाले पनि सम्बोधन गर्नुभएको थियो ।

बैठकले अध्यक्ष प्रेम सापकोटाको संयोजकत्वमा सात सदस्यीय व्यवस्थापन समिति, कोषाध्यक्ष दिनेश खड्काको संयोजकत्वमा आर्थिक समिती, सचिव त्रिभुवन भट्टराईको संयोजकत्वमा प्रचार प्रसार समिति, सदस्य बिलबहादुर गुरुङको संयोजकत्वमा सांस्कृतिक समिति, सदस्य प्रेम आचार्यको संयोजकत्वमा स्वयम्सेवक समिति, सदस्य तिलक पौड्यालको संयोजकत्वमा मेस समिति पनि गठन गरेको छ।

कार्यक्रम क्षेत्रीय अध्यक्ष प्रेम सापकोटाको अध्यक्षतामा तथा सचिव त्रिभुवन भट्टराईको सञ्चालनमा तथा कुलबहादुर बगाले स्वागत मन्तव्यसँगै सम्पन्न भएको थियो ।