काठमाडौँ । चार किसान सङ्गठनहरूले नेपाल सरकारसित प्रश्न गरेका छन् : कुन स्वार्थका कारण विषादियुक्त भारतीय नेपाली तरकारी नेपाल भित्रिन्छ ?
भारतीय विषादियुक्त तरकारीका कारण नेपाली जनताको स्वास्थ्यमाथि प्रतिकूल असर परिरहेको सन्दर्भमा उनीहरूले २०७९ फागुन १९ गते शुक्रबार प्रेसवक्तव्य जारी गर्दै सरकारसित यस्तो प्रश्न गरेका हुन् ।
उनीहरूले सरकारको आफ्ना जनताको स्वास्थ्यको ख्याल नगरिकन निर्वाध रूपमा भारतीय तरकारी नेपाल भित्रिन दिने निर्णयलाई शङ्काको घेरामा राखेका छन् । चार किसान सङ्गठनले तत्कालै भारतीय विषादियुक्त तरकारीको आयात नरोके आन्दोलनमा उत्रिने चेतावनी पनि दिएका छन् ।
उनीहरू वक्तव्यमा भनेका छन् :
“हामी चार किसान सङ्गठनहरू नेपाल सरकारले कानुन बनाएर संस्थागत रूपमा भारतबाट आयात हुने विषादी तरकारीको नियन्त्रण गरोस् र नेपाली जनताको स्वास्थ्य रहन पाउने अधिकारको संरक्षण र सम्बद्र्धन गरोस भन्ने जोडदार माग लगातार गर्दै आएका छौँ तर सरकारको कानमा पटक्कै बतास लागेको छैन । यसले गर्दा भारतबाट निर्बाध कुनै चेकजाँचबिना विषादीयुक्त तरकारी नेपाल भित्रिरहेको छ । यसले नेपाली उपभोक्ताको स्वास्थ्यमा गम्भीर नकारात्मक असर परिरहेको कुरामा दुई मत छैन । बेला बेलामा यो कुरा चर्चामा आउने गरे पनि सरकारले कुन स्वार्थले विषादियुक्त तरकारी नेपाल भित्रिन र नेपाली तरकारीको तुलनामा सस्तोमा भारतीय तरकारी नेपालमा विक्री–वितरण गर्न दिन्छ भन्ने प्रश्न उठेको छ । यो ठुलो शङ्काको घेरामा छ ।
अत: हामी तरकारीलगायत दैनिक उपभोग्य खाद्यवस्तुहरूमा विषादीको प्रयोग बन्द गर्न र त्यस्ता खाद्यपदार्थको आयात बन्द गर्न तथा तरकारीलगायतका खाद्यजन्य सबै बालीनालीको उत्पादन गर्न मानव स्वास्थ्यका लागि हानिकारक र घातक रासायनिक पदार्थको प्रयोग गर्न नदिन कडा कानुन बनाउन र कडाइका साथ लागु गर्न तथा त्यस्ता वस्तुको आयातमा प्रतिबन्ध लगाउन र जैविक उपायको अवलम्बन गर्न पुन: जोडदार माग गर्दछौँ । सरकारले यसबारे तुरुन्त कदम नचाले विषादीयुक्त आयातित वस्तुहरू रोक्न किसान सङ्गठनको तर्फबाट आन्दोलनमा उत्रिन बाध्य हुने कुरा अवगत गराउँछौँ ।”
वक्तव्यमा अखिल नेपाल किसान महासङ्घ (अप्फा) का अध्यक्ष भैरवराज रेग्मी, अखिल नेपाल किसान महासङ्घ (क्रान्तिकारीका अध्यक्ष सीताराम तामाङ, अखिल नेपाल किसान यूनियनका इन्चार्ज लोकनारायण सुवेदी र अखिल नेपाल प्रगतिशील किसान सङ्घका अध्यक्ष दुर्गाप्रसाद जैसीको हस्ताक्षर रहेको छ ।
