बसन्त खड्का, अर्घाखाँची ।
राष्ट्रिय जनमोर्चा अर्घाखाँचीको पाचौं जिल्ला सम्मेलन अगामी २०८० वैशाख ८ र ९ गते हुने भएको छ । राजमो अर्घाखाँचीले आइतबार सन्धिखर्कमा पत्रकार सम्मेलन गरि उक्त कुरा जनाएको हो ।
‘गणतन्त्र र राष्ट्रियताको रक्षा, संघीयता खारेजीको हाम्रो आन्दोलन, वातावरणीय सन्तुलनसँगै समुन्नत अर्घाखाँचीको लागि ५ औं जिल्ला सम्मेलन’ भन्ने मुल नाराका साथ जिल्ला सम्मेलन गर्न लागिएको राजमो अर्घाखाँचीले जनाएको छ ।
राजमो अर्घाखाँचीले पत्रकार सम्मेलनसँगै प्रेस विज्ञप्ती जारी गर्दै जिल्लामा ब्याप्त अनियमितता र भ्रष्टाचारको विरुद्धमा पहलकदमी लिन सम्बन्धित सबैमा ध्यानाकर्षण समेत गराएको छ ।
विज्ञप्तिमा भनिएको छ, ‘जिल्लामा बढिरहेको वातावरणीय असन्तुलनले जिल्लाका पर्यटकीय, धार्मिक, एतिहासिक ,सांस्कृतिक क्षेत्रमा ठूलो समस्या भएको छ। जिल्लामा हुने विकास निर्माणका काममा अनियमितता, गुणस्तरहीन, अपारदर्शि कामहरु भैरहेका छन् । सम्बन्धित उचित ध्यान नपुगेको अवस्था छ त्यसको समाधानको लागि सम्बन्धित सबैको ध्यानाकर्षण गराउन चाहन्छौँ।’
सम्मेलन सफल पार्न अध्यक्ष थम्मन केसीको संयोजकत्वमा मुल व्यवस्थापन समिति गठन गरेको छ ।
त्यस्तै, थम्मन केसीकै संयोजकत्वमा ११५ सदसीय सम्मेलन तयारी समिति, बाबुराम पन्थीको संयोजकत्वमा प्रचारप्रसार समिति गठन गरेको छ ।
यसैगरी फागुन १८ सम्म सम्पूर्ण पालिकाको बैठक सम्पन्न गर्दै फागुन मसान्तसम्म वडास्तरका बैठकहरु पनि सकेर चैत १२ सम्म पालिका र वडा स्तरीय सम्मेलन सक्ने कार्यतालिका समेत प्रकाशित गरेको छ ।
पत्रकार सम्मेलनको अध्यक्षता गोपाल पौडेलले गर्नुभएको थियो भने सञ्चालन बाबुराम पन्थीले गर्नुभएको थियो ।
