काठमाडौं । काठमाडौंको बूढानीलकण्ठ नगरपालिका–१० बालुवाखानीमा रहेको फेरिल्याण्ड इन्टरनेशनल स्कुलले १४ औं वार्षिकउत्सव मनाएको छ ।
शनिबार (१३ फागुनमा) विद्यालयले एक कार्यक्रम आयोजना गरी १४ औँ वार्षिकोत्सव तथा अभिभावक दिवस मनाएको हो ।
कार्यक्रममा विद्यालयले ८० वर्ष नाघेका ज्येष्ठ नागरिकलाई सम्मान गरेको थियो । कार्यक्रमका प्रमुख अतिथि बूढानीलकण्ठ नगरपालिकाका मेयर मिठाराम अधिकारीले विद्यालयका अभिभावक रहेका ज्येष्ठ नागरिकलाई दोसल्ला ओढाएर सम्मान पत्रसहित सम्मान गर्नुभयो ।
यस्तै, विद्यालयले सञ्चारकर्मी तथा लामो समय विद्यालयमा योगदान पुर्याएका शिक्षक–शिक्षिकालाई समेत मायाको चिनो दिएर सम्मान गरेको थियो ।
त्यसक्रममा बोल्दै मेयर अधिकारीले बूढानीलकण्ठ नगरपालिका भरिमा फेरिल्याण्ड स्कुलले विविध गतिविधिमा उत्कृष्ट नतिजा ल्याउन सफल भएकोमा प्रशंसा गर्नुभयो ।
प्याब्सनका केन्द्रीय उपाध्यक्ष कृष्ण अधिकारीले फेरिल्याण्डको गतिविधि देखेर आफू लोभिएको बताउँदै प्रिन्सिपल विष्णुचन्द्र अधिकारीको नेतृत्वमा विद्यालयले फड्को मारेको बताउनु्भयो ।
विद्यालयका फाउण्डर प्रिन्सिपल विष्णुचन्द्र अधिकारीले यो वर्ष मात्रै विविध १२ विधामा विद्यालयले अवार्ड जित्न सफल भएको जानकारी दिनुभयो ।
उहाँले विद्यार्थीको मनोविज्ञान बुझेर अभिभावकको सुझावअनुसार पढन पाढन लगायका गतिविधि अगाडि बढाइएको बताउनुभयो ।
कार्यक्रममा विद्यार्थीहरुले विविध सांस्कृतिक कार्यक्रम प्रस्तुत गरेका थिए । यस्तै, राष्ट्रियस्तरका कलाकार सुनिता बुढा क्षेत्री र कमलीकान्त भेटवालले पनि आफ्ना गीतमार्फत अभिभावकलाई नचाउनुभएको थियो ।
सम्पादक अधिकारी सम्मानित
यसैबीच फेरिल्याण्ड इन्टरनेशनल स्कुलले युगदर्शनका सम्पादक विद्यानाथ अधिकारीलाई सम्मान गरेको छ । विद्यालयको १४ औँ वार्षिकोत्सवका अवसरमा बूढानीलकण्ठका मेयर मिठाराम अधिकारीले सम्पादक अधिकारीसहित तीन जना सञ्चारकर्मीलाई सम्मान पत्रसहित सम्मान गर्नुभएको हो ।
सम्पादक अधिकारीले पत्रकारिताको माध्यमबाट शिक्षाको उन्ननयमा योगदान पुर्याएको सम्मान पत्रमा उल्लेख छ ।
