काठमाडौं । राष्ट्रपतिको उम्मेदवार कसलाई बनाउने भन्ने विवादले सत्तागठबन्धन धरापमा परेको छ । राष्ट्रपति निर्वाचनमा निर्णायक रहेको सत्ताधारी दल नेकपा (माओवादी केन्द्र) ले एमालेका उम्मेदवारलाई सघाउन नचाहेपछि गठबन्धन टुट्ने सम्भावना बढेको हो ।

प्रधानमन्त्री पुष्पकमल दाहाल प्रचण्डले राष्ट्रपतिको सन्दर्भमा एमालेसँग भन्दा गत पुस १० गते भत्किएको गठबन्धन दलका नेताहरुसँग छलफल बाक्लो बनाएपछि एमाले झस्किएको छ । नेपाली कांग्रेसले राष्ट्रपतिमा माओवादीले आफ्ना उम्मेदवारलाई सघाउने विश्वाससहित प्रधानमन्त्री पुष्पकमल दाहाल प्रचण्डसँग छलफल गरिरहेको छ ।

यता, भत्किएको पाँचदलीय गठबन्धनका दलहरु नेकपा (एकीकृत समाजवादी) र जनता समाजवादी पार्टी पनि एमालेलाई भन्दा कांग्रेसलाई नै राष्ट्रपति बनाउन तयार देखिन्छन् ।

यस्तो अवस्थामा सत्ता गठबन्धन कायमै रहला वा भत्किएला त्यसको टुंगो सम्भवतः आज लाग्नेछ। राष्ट्रपति निर्वाचनका विषयमा प्रधानमन्त्री दाहालले आज एमाले अध्यक्ष केपी शर्मा ओलीसँग ‘निर्णायक’ वार्ता गर्ने बताएका छन्।

आज प्रधानमन्त्री प्रचण्ड र एमाले अध्यक्ष ओलीबीच राष्ट्रपति उम्मेदवारका विषयमा सहमति नभए वर्तमान सत्ता गठबन्धन टुट्ने र पुरानो पाँच दलीय गठबन्धन ब्युँतनेसम्मका चर्चा भइरहेको छ।

राष्ट्रपति पद कांग्रेसलाई, उपराष्ट्रपति पद जसपाले लिने र सरकारको नेतृत्व आलोपालो गर्ने गरी पुरानो गठबन्धन ब्युँताउने प्रयासमा नेताहरू लागेका छन्।

कांग्रेस सभापति शेरबहादुर देउवाले प्रधानमन्त्री पदमा अडान नछाडेपछि माओवादी केन्द्रका अध्यक्ष प्रचण्ड पुरानो गठबन्धन तोड्दै एमालेलगायत सात दलको नयाँ समीकरण बनाएर प्रधानमन्त्री बनेका थिए। तर अहिले फेरि राष्ट्रपति पदमा एमालेले आफ्नो अडान नछाडेपछि यो गठबन्धन पनि तोडिने अवस्थामा पुगेको हो।

आज अन्तिम मतदाता नामावली प्रकाशन
राष्ट्रपति निर्वाचन प्रक्रियाअन्तर्गत आज अन्तिम मतदाता नामावली प्रकाशन हुने भएको छ। मतदाता नामावलीमा समावेश नाममा दावी विरोध, उजुरी र छानबिन पछि आज अन्तिम नामावली प्रकाशन गर्ने कार्यतालिका निर्वाचन आयोगको छ।

आयोगको निर्वाचन कार्यतालिका अनुसार भोलि उम्मेदवारी दर्ता हुनेछ। राष्ट्रपतिका लागि फागुन २५ गते बिहान १० बजेदेखि ३ बजेसम्म मतदान हुनेछ। अपराह्न ४ बजेदेखि मतगणना प्रारम्भ गरी सोही दिन ७ बजेभित्रमा नतिजा सार्वजनिक गर्ने आयोगको तयारी छ।

दावी विरोध र उजुरीमा कुनै निवेदन नपरेको आयोगले जनाएको छ । कैलाली जिल्ला निर्वाचन क्षेत्र नम्बर–२ बाट निर्वाचित सांसद अरुणकुमार चौधरीको नाम मतदाता नामावलीमा समावेश गर्न भने निवेदन परेको छ। अन्य चारवटा निवेदन भने नाम सच्याउने विषयमा रहेको निर्वाचन अधिकृतको कार्यालयले जनाएको छ।