स्याङजा बजार । राष्ट्रिय जनमोर्चाले स्याङ्जाको वालिङमा विरोधसभा सम्पन्न गरेको छ । ‘गणतन्त्र, धर्म निरपेक्षता र राष्ट्रिय स्वाधिनताको रक्षा गरौँ, सङ्घीयता खारेज गरौ’ नाराका साथ सो कार्यक्रम सम्पन्न भएको हो ।
सभाका प्रमुख अतिथि अखिल (छैठौँ) का केन्द्रीय उपाध्यक्ष गणेश अधिकारी हुनुहुन्थ्यो ।
कार्यक्रममा सम्बोधन गर्ने क्रममा उहाँले नेपाली जनताले गत लामो समयको सङ्घर्ष र बलिदानीबाट करिब २४० वर्षसम्म शासन गरेको सामन्ती व्यवस्थाको नेतृत्व गरेको राजतन्त्रको अन्त्य गरेर गणतन्त्र ल्याए पनि अहिले गणतन्त्रमाथि खतरा बढिरहेको बताउनुभयो ।
उहाँले गणतन्त्रलाई समाप्त पार्न देशीय पुनरुत्थानवादी मात्रै नभएर साम्राज्यवादी शक्तिहरू पनि लागेको बताउनुभयो ।
२०६२–६३ सालको जनआन्दोलनमा जनताले सङ्घीयताको माग नगरेको तर भारतीय साम्राज्यवाद, अमेरिकी साम्राज्यवाद, युरोपियन युनियनको इसारामा जबर्जस्ती सङ्घीयता लादिएको भन्दै उहाँले त्यसको खारेजीका लागि सिङ्गो देश आन्दोलित हुनुपर्ने बताउनुभयो ।
‘देशमा आर्थिक सङ्कट देखा पर्नुमा सङ्घीयता पनि एउटा कारक तत्त्व रहेको कुरा नकार्न नसकिने र आर्थिक दृष्टिकोणले आठओटा सरकार र संसद्ले सेतो हात्ती भइसकेकाले र नेपाली जनताले यसलाई पाल्न नसक्ने हुँदा यसलाई चाडोभन्दा चाडो हटाउनु आजको प्रमुख आवश्यकता हो’ उहाँको भनाइ थियो ।
त्यस्तै, अमेरिकाले नेपालमा स्वतन्त्र नामक पार्टी खोलेर नेपालको राजनीति र पार्टीमा जबर्जस्त आफ्नो उपस्थिति देखाएको उहाँले बताउनुभयो ।
एमाले, काङ्ग्रेस र माओवादीको शासन व्यवस्थाले दिक्क भएर जनताले विकल्प खोज्दा र डलरको वर्षाले रवि लामिछानेको पार्टीले पार्टी खोलेको छ महिनामा नै गृहमन्त्री बन्ने र संसद्को चौथो पार्टीको रूपमा उदाउन सफल भएको कुरा बताउनुभयो ।
राप्रपाले पनि आफ्नो प्रतिगामी उद्देश्य राजतन्त्रसहित हिन्दु राज्यस्थापनाका लागि जनताको असन्तुष्टि र चेतनाबाट फाइदा उठाउने मौका खोजिरहेकोले जनताको सेन्टिमेन्ट क्याच गर्न सङ्घीयता र धर्म निरपेक्षताको विरोध गर्ने गरेको उहाँको भनाइ थियो ।
कार्यक्रममा राजमो जिल्ला सदस्य गङ्गाधर रेग्मी पनि सम्बोधन गर्नुभएको थियो । कार्यक्रमको अध्यक्षता राजमो जिल्ला अध्यक्ष राजेन्द्र गैरेले तथा सञ्चालन प्रकाश परियारले गर्नुभएको थियो ।
