काठमाडौँ । अन्तर्राष्ट्रिय महोत्सवमा पुरस्कृत चलचित्र “हल्कारा” नेपालमा आउँदो वर्षको वैशाख २९ मा प्रदर्शन हुने भएको छ । निर्माण पक्षले नयाँ पोस्टर सार्वजनिक गर्दै घोषणा गरेको हो ।
विक्रम सापकोटाको लेखन तथा निर्देशनमा तयार चलचित्रमा महेश त्रिपाठी र विनिता थापामगर प्रमुख भूमिकामा छन् ।
‘गाउँमा चिठी पर्याउने एक हल्काराको माध्यमबाट बैदेसिक रोजगारीले नेपाली समाजमा पारेको प्रभावलाई देखाउने कोसिस गरेका छौँ’ निर्देशक सापकोटाले भन्नुभयो– ‘सत्यकथा प्रेरित भएता पनि मनोरञ्जक हिसाबले प्रस्तुत गर्ने गरिएको छ ।’
यसमा अभिनेता त्रिपाठीले हुलाकीको चरित्र निर्वाह गरेका छन् । यसमा उमेश तामाङ, पशुपति राई, दीपक क्षेत्री, विद्या कार्की आदि कलाकारको अभिनयसमेत छ ।
“हल्कारा” अमेरिकाको वल्र्ड फेस्ट ह्युस्टन फिल्म फेस्टिभलमा उत्कृष्ट घोषित भएको थियो भने अभिनेता त्रिपाठीले उत्कृष्ट अभिनेताको पुरस्कार जितेका थिए ।
त्यस्तै, नेपाल–अमेरिका फिल्म फेस्टिभलमा लङ न्यारेटिभ विधामा पुरस्कृत हुन सफल भएको यो चलचित्र अन्य महोत्सवमा समेत छनोट भएको थियो ।
यसअगाडि “कालो पोथी”, “सेतो सूर्य” लगायतका चलचित्रसमेत अन्तर्राष्ट्रिय महोत्सवमा पुरस्कृत भएपछि मात्र प्रदर्शन भएका थिए ।
