हेम बिजी, चिदम्बरम ।
मूल प्रवाह अखिल भारत नेपाली एकता समाजले नेपालमा चलिरहेको संघीयताविरुद्धको आन्दोलनप्रति भारतमा पनि ऐक्यवद्धता जनाएको छ ।
‘गणतन्त्र र राष्ट्रियताको रक्षा गरौं,संघीयता खारेज गरौं’ भन्ने मूल नारासहित राष्ट्रिय जनमोर्चाले सञ्चालन गरिरहेको विरोध कार्यक्रमलाई मूल प्रवाह चिदम्बरम नगर समितिले पनि विरोध सभाको आयोजना गरी ऐक्यवद्धता जनाएको छ ।
गोकूल बहादुर गायकको उदघोषक, हेम बिजीको अध्यक्षता रहेको उक्त सभामा केन्द्रीय प्रतिनिधि चन्द्रकान्त शर्मा, केन्द्रीय सदस्य बालाकृष्ण गायक र क्षेत्रीय सदस्य डिल्ली प्रसाद शर्माको आतिथ्यता रहेको थियो। सहिदहरुको सम्मानमा एक मिनेट मौनधारण गरेर अघि बढेको उक्त कार्यक्रममा जीवन पराजुलीले स्वागत गर्नु भएको थियो ।
कार्यक्रमका प्रमुख अतिथि केन्द्रीय प्रतिनिथि चन्द्रकान्त शर्माले आफ्नो मन्तव्य राख्दै संघीयता विदेशीहरुले बोकाई दिएको भारी हो भन्नुभयो । नेपाल जस्तो परनिर्भरता र रेमिट्यान्सबाट अर्थतन्त्र चलेको राष्ट्रमा संघीयता देशले धान्नै नसक्ने उहाँले बताउनुभयो ।
शर्माले नयाँ संविधान खतम गर्न प्रतिगामी पार्टीहरू र विदेशी शक्तिहरु लागिरहेको बताउँदै संविधान खतम भएमा गणतन्त्र, धर्मनिरपेक्षता र जनअधिकारहरु मासिने चिन्ता प्रकट गर्नु भयो । सीमा अतिक्रमण, राष्ट्रघाति नागरिकता विधेयक, एमसीसी, एसपीपी जस्ता गतिविधि र सन्धि सम्झौताले देशको राष्ट्रियता, राष्ट्रिय अखण्ता र सार्वभौमिकता गुम्ने भन्दै उहाँले ‘गणतन्त्र र राष्ट्रियताको रक्षा गरौं ! संघीयता खारेज गरौं’ भन्ने मूल नारासहित भारत प्रवासमा मूल प्रवाहको आयोजनामा भईरहेका ‘ऐक्यवद्धता सभा’ कार्यक्रमले देश बचाउन महत्वपूर्ण भूमिका खेल्ने विचार व्यक्त गर्नु भयो।
कार्यक्रममा केन्द्रीय सदस्य बालाकृष्ण गायक, क्षेत्रीय सदस्य डिल्ली प्रसाद शर्मा र प्रेम पराजुलीले पनि मन्तव्य राख्नु भएको थियो ।
