मेघराज रिष्मेली, बागलुङ बजार ।
गुल्मीको मुसिकोट नगरपालिका–९, अर्लाङकोटस्थित ज्ञानज्योति आधारभूत विद्यालयलाई तुलसिराम खरेल परिवारले बाह्र लाख एघार हजार एक सय एकाउन्न सहयोग गर्नुभएको छ ।
विद्यालयको स्तरोन्नति र शैक्षिक गुणस्तर सुधार हेतु सहयोग सङ्कलनका लागि विद्यालयले रजत महोत्सवको अवसरमा आयोजना गरेको कार्यक्रममा मुसिकोट नगरपालिका–९ ददल्कामा जन्मेर जापानमा व्यवसाय गर्दै आउनुभएका तुलसीराम खरेल परिवारले सो रकम सहयोग गरेको हो ।
उहाँले सो रकम मातापिताको स्मृतिमा उपलब्ध गराउनुभएको बताउनुभयो । उक्त सहयोग गरेकोमा विद्यालय आयोजक समितिले बधाई एवम् आभार व्यक्त गरेको छ ।
विद्यालयले २०७९ फागुन ९ देखि १५ गतेसम्म विद्यालयको रजत जयन्ती महोत्सव कार्यक्रमको आयोजना गर्दै छ ।
समाजसेवी तुलसीराम खरेल एनआरएनए जापानका पुर्व उपाध्यक्ष हुँदै अन्तर्राष्ट्रिय समन्वय समिति (आइसिसी) सदस्य हुनुहुन्छ । खरेल गुल्मेली समाज जापानको उपाध्यक्ष रहिसक्नुभएको छ । हाल उहाँ एनआरएनए जापान र चितवन समाजको सल्लाहकार हुनुहुन्छ ।
जापानको ओसाका कान्साई क्षेत्रमा रहेका विभिन्न सङ्घसंस्थामा संरक्षक एवम् सल्लाहकारको भूमिका निर्वाह गर्दै आउनुभएको छ । ददल्का स्कुलको आजीवन सदस्य, इन्टरनेसनल स्कुल जापानको संस्थापक सदस्य तथा बोर्ड मेम्बर र अर्लाङकोट सेवा समाज जापानको संस्थापक संरक्षक हुनुहुन्छ ।
२०५४ सालमा स्थापना भएको ज्ञानज्योति आधारभूत विद्यालयमा हाल कक्षा १ देखि ८ सम्मका कक्षा सञ्चालन हुँदै आएका छन् ।
