काठमाडौँ । अखिल नेपाल प्रगतिशील लेखक सङ्घ (अन्पा) ले साहित्यिक पदयात्रा तथा रचना वाचन कार्यक्रम सम्पन्न गरेको छ ।
राष्ट्रिय जनमोर्चाका अध्यक्ष तथा प्रतिनिधि सभाका सांसद चित्रबहादुर केसीको उद्घाटनसँगै उक्त कार्यक्रम २०७९ माघ २७ गते शुक्रबार काठमाडौँमा सम्पन्न भएको हो ।
“कपन ज्योतिनगरदेखि तारेभिरसम्म” नाम दिइएको उक्त पदयात्रा (हाइकिङ) को उद्घाटन राजमो अध्यक्ष चित्रबहादुर केसीले केन्द्रीय कार्यालय कपनमा उद्घाटन गर्नुभएको थियो । सो अवसरमा उहाँले कार्यक्रमको शुभकामना व्यक्त गर्नुभएको थियो ।
उद्घाटन कार्यक्रमको अवसरमा राजमो महासचिव मनोज भट्टको पनि उपस्थिति रहेको थियो ।
कपन ज्योतिनगरदेखि कपन गुम्बा हुँदै तारेभिरसम्म चलेको उक्त कार्यक्रमको बिच भागमा अखिल (छैठौं) का पूर्व अध्यक्ष विमल पोखरेल, अन्पाका अध्यक्ष समीर सिंह र अन्पाका सचिवालय सदस्य बैरागी जेठाले कविता वाचन गर्नुभएको थियो ।
तारेभिरमा पुगिसकेपछि आयोजना गरिएको अर्को कार्यक्रममा अन्पाका अध्यक्ष समीर सिंह, अन्पाकै महासचिव प्रकाश थापामगर र प्रलेस काठमाडौँकी सचिव समष्टि बुढाले कविता वाचन गर्नुभएको थियो भने रक्तिम सांस्कृतिक अभियान काठमाडौँकी अध्यक्ष मेस्मा पुनले गीत र राजमो केन्द्रीय कार्यालयका स्टाफ मदन पाण्डेले मुरली वादन गर्नुभएको थियो ।
सो अवसरमा अखिल (छैठौँ) का पूर्व महासचिव घनश्याम न्यौपाने र अखिल (छैठौं) कै पूर्व अध्यक्ष विमल पोखरेलले मन्तव्य राख्नुभएको थियो ।
तारेभिरदेखि साहित्यिक पदयात्राको उक्त टोली बुढानीलकण्ठ हुँदै फर्केको थियो ।
पदयात्रामा समीर सिंह, प्रकाश थापामगर, वैरागी जेठा, घनश्याम न्यौपाने, मदन पाण्डे, मेस्मा पुन, समष्टि बुढा, युजिन श्रेष्ठ र पुष्पा पाण्डे सहभागी हुनुहुन्थ्यो ।
