धनवीर पुनमगर, अहमदावाद (भारत) ।
गुजरातको अहमदावादस्थित नरोडा जिआइडिसीमा एक नेपालीको आधारकार्डको अभावमा दाहसंस्कार हुन सकेन ।
कञ्चनपुर जिल्ला, चाँदनीदोधारा–२ निवासी ६८ वर्षीया बुद्धिसरा टमटाको निधन भएपछि दाहसंस्कारको क्रममा आधारकार्ड खोजिएको हो ।
उनको जनवरी १, २०२३ का दिन अहमदावादको नरोडा जिआइडिसीमा मृत्यु भएको थियो ।
भारतस्थित श्रमजीवी नेपालीको सामाजिक तथा अभिभावकीय भूमिका निर्वाह गर्दै आएको सङ्गठन मूल प्रवाह अखिल भारत नेपाली एकता समाजले सो समस्या समाधान गर्नका लागि पहल गरेको छ ।
समाजको एरिया समितिका अध्यक्षलगायत विभिन्न कार्यकर्ताको पहलमा स्थानीय पुलिस प्रशासनलाई दाहसंस्कार स्थलमा पुर्याई आवश्यक सर्त पूरा गराइएको थियो ।
रासनकार्ड, आधारकार्ड, भोटरकार्ड, पानकार्ड—यी कुनै पनि भारतीय नागरिकताको प्रमाणपत्र होइनन् । भारतमा नागरिकता प्रमाणपत्र प्रदान गर्ने प्रचलन छैन । रासनकार्ड खाद्यसामग्री प्राप्तिका लागि, आधारकार्ड भारतमा बसोबास गरेकालाई आधारभूत सुविधा प्रदान गर्न, भोटरकार्ड निर्वाचन प्रयोजनका लागि र पानकार्ड कारोबारका लागि मात्रै प्रदान गरिन्छ ।
सन १९५० को नेपाल–भारत शान्ति तथा मैत्री सन्धिअनुसार दुबै देशका नागरिक एकअर्काको देशमा स्वतन्त्र रूपमा आवतजावत गर्न पाउनुका साथै रोजगार, सम्पत्तिआर्जनलगायत विभिन्न प्रकारका अधिकार निश्चित गरिएको छ तर भारत सरकारले नयाँ नीतिअनुसार भारतमा रहने जुनसुकै व्यक्तिले आधारभूत सुविधा प्राप्त गर्न आधारकार्ड अनिवार्य बनाएको छ ।
आधारकार्ड बनाउन सरकारले कैयौँ नयाँ नयाँ सर्तसमेत जारी गर्दै आएको छ । सुरुका दिनमा आधारकार्ड केवल परिचयका लागि बनाइएता पनि हालका दिनमा अनिवार्य सर्तको रूपमा प्रयोग हुँदै आएको छ ।
