वासिङ्टन । अमेरिकाले सोलोमन टापुमा दूतावास खोलेको छ । एसिया–प्रसान्त क्षेत्रमा चीनको बढ्दो प्रभावलाई रोक्न तथा आफ्नो संलग्नता बढाउन अमेरिकाले दूतावास स्थापना गरेको एनएचके वल्र्डले दाबी गरेको छ ।
अमेरिकी विदेशमन्त्री एन्टोनी ब्लिङ्कनले सोलोमन टापुको राजधानी होनियारामा दूतावास स्थापना हुनु दुई देशबिच विद्यमान सुमधुर सम्बन्धको नवीकरणको प्रतीक भएको बताउनुभयो । सन् १९९३ मा अमेरिकाले टापु राष्ट्रमा रहेको आफ्नो दूतावास बन्द गरेको थियो ।
‘आज हामी संयुक्त राज्य अमेरिकाको होनियारा, सोलोमन टापुमा दूतावास खोलेका छौँ, हामीले दूतावास स्थापना गर्ने चाहना घोषणा गरेको एक वर्षभन्दा कम समयमै त्यो पूरा भएको छ । यसबाट हाम्रो सम्बन्ध नवीकृत भएको छ, यसले हाम्रो द्विपक्षीय सम्बन्धप्रतिको प्रतिबद्धता झल्काउँछ । सोलोमन टापुका जनता तथा एसिया–प्रसान्त क्षेत्रमा हाम्रो साझेदारी बढाउन सहज हुने छ’ अमेरिकी विदेश मन्त्रालयले जारी गरेको विज्ञप्तिमा भनिएको छ ।
अमेरिकाले सोलोमन टापुसँग आर्थिक विकास तथा साझेदारी, कोभिड–१९ महामारी विरुद्धको लडाइँ, जलवायु परिवर्तनका चुनौतीलगायत समस्या सम्बोधनमा सघाएको तथा ती क्षेत्रमा जारी सहयोग एवम् साझेदारीलाई सुदृढ गर्न तत्पर रहेको जनाएको छ ।
जनता–जनताबिचको सम्बन्ध विस्तारमा दूतावासको भूमिका महत्त्वपूर्ण हुने उल्लेख गर्दैै विज्ञप्तिमा प्रसान्त क्षेत्रका अन्य टापु राष्ट्रसँको साझेदारी प्रवद्र्धनमा बल पुग्ने विश्वास व्यक्त गरिएको छ । (रासस/एएनआई)
