फरीदावाद। मूल प्रवाह अखिल भारत नेपाली एकता समाज फरीदावाद नगर समितिले नेपालमा राष्ट्रिय जनमोर्चाले सञ्चालन गरिरहेको संघीयताविरुद्धको अभियानमा ऐक्यवद्धता जनाएको छ ।
मूल प्रवाह फरीदावादले ‘प्रजातन्त्र र राष्ट्रियताको रक्षा गरौं, संघीयता खारेज गरौं’ भन्ने मुल नारासहित ऐक्यवद्धता सभा गरेको हो ।
सो क्रममा वनभोज कार्यक्रमको पनि आयोजना गरिएको थियो । कार्यक्रममा मूल प्रवाहका केन्द्रीय अध्यक्ष ठाकुर खनालले राष्ट्रियता, जनतन्त्र र जनजिवीकाको पक्षमा मूल प्रवाहले निरन्तर आवाज उठाउँदै आएको बताउनु भयो ।
उहाँले मूल प्रवाह अखिल भारत नेपाली एकता समाजले भारत स्थित नेपालीहरूको चेतनास्तर वृद्धि तथा नेपालीहरुका बीचमा सद्भावका लागिसमेत निरन्तर काम गर्दै आएको बताउनु भयो ।
‘नेपालीहरु एकजुट भएर बस्नु पर्छ र मूल प्रवाह अखिल भारत नेपाली एकता समाजको झण्डा मुनि गोलवन्द हुनुपर्छ’ उहाँले भन्नुभयो ।
कार्यक्रममा केन्द्रीय सल्लाहकार रमेश चन्द्र क्षेत्री, केन्द्रीय परिषद सदस्य विष्णु बिसी, क्षेत्रीय सदस्य चन्द्र अधिकारी, महिला नगर विभागकि संयोजक माया बिसी, विद्यार्थी विभागबाट कमल कुँवर, नगर समितिबाट मानसिंह विष्टको आतिथ्यता रहेको थियो ।
नगर अध्यक्ष बाबुराम विष्टको अध्यक्षता र सचिव धर्म खनालको सञ्चालनमा अगाडि बढेको उक्त कार्यक्रममा ज्ञात अज्ञात सहिदहरूप्रति एक मिनट मौनधारण राखिएको थियो । स्वागत नगर सदस्य सूर्य बहादुर क्षेत्रीले गर्नुभएको थियो ।
कार्यक्रममा बल्लभगढ एरियाबाट उमेश जिसी, एनआईटीबाट लोकराज थापा, हेवल हेमला एरियाबाट मान सिंह विष्टले मन्तब्य राख्नु भएको थियो ।
