खिमराज चालिसे, चण्डीगढ (भारत) ।
जी–२० बैठकको सन्दर्भमा भारतको चंडिगढस्थित ट्रिबुन चौकमा नेपालको झण्डा उल्टो राखेको पाइएको छ । नेपाल लगायत सम्मेलनमा सहभागी हुने विभिन्न देशको झण्डा लगाउने क्रममा नेपालको झण्डा उल्टो लगाइएको हो ।
नेपालको राष्ट्रिय झण्डामा माथि चन्द्रमा र तल सूर्य हुन्छ । तर, त्यहाँ लगाइएको झण्डामा माथि सूर्य र तल चन्द्रमा छ । भिडिओ र फोटो तथा त्यहाँ लगाइएको सीसीटीभीमा समेत नेपालको झण्डा उल्टो राखिएको दृश्य देख्न सकिन्छ ।
सो शहरमा बस्ने नेपाली समुदायले भने नेपालको झण्डा उल्टो लगाएर नेपाल र नेपालीको स्वाभिमानमाथि नै अपमानित गरिएको भन्दै आपत्ति जनाएका छन् ।
१८औं जी २० राष्ट्रहरू र सरकार प्रमुखहरूको शिखर सम्मेलन ९–१० सेप्टेम्बर २०२३ मा नयाँ दिल्लीमा हुनेछ । शिखर सम्मेलन सबै जी २० प्रक्रियाहरू र मन्त्रीहरू, वरिष्ठ अधिकारीहरू र नागरिक समाजहरू बीच वर्षभरि आयोजित बैठकहरूको परिणति हुनेछ ।
नयाँ दिल्ली शिखर सम्मेलनको समापनमा जी२० नेताहरूको घोषणा–पत्र स्वीकार गरिनेछ, सम्बन्धित मन्त्री र कार्य समूह बैठकहरूमा छलफल र सहमति भएका प्राथमिकताहरूप्रति नेताहरूको प्रतिबद्धता जनाउने छन् । उक्त सम्मेलनपूर्व जी २० का देशहरुको प्रतिनिधित्वमा बैठक सम्पन्न हुँदैछ ।
सो बैठकको पूर्वसन्ध्यामा झण्डा लगाइएको हो । अन्तर्राष्ट्रिय स्तरमा हुने कार्यक्रममा गलत तरिकाले लगाइएको झण्डा भूलबस हो वा नियतबस हो, अहिले नै भन्न सकिने अवस्था छैन । यदी नियतबस यस्तो गरिएको हो भने नेपालप्रतिको भारतीय हेपाहा प्रवृति अन्तर्राष्ट्रिय मञ्चमा प्रकट भएको कुरा बुझ्न गाह्रो पर्दैन ।
