दिल्ली । मूल प्रवाह अखिल भारत नेपाली एकता समाजका केन्द्रीय अध्यक्ष ठाकुर खनालले मूल प्रवाह अखिल भारत नेपाली एकता समाज सधैं प्रवासी नेपाली हरुको हकहित र न्यायको पक्षमा रहेको बताउनु भएको छ ।
समाजको पश्चिमोत्तर तथा मध्य पश्चिमोत्तर क्षेत्रीय समितिको संयुक्त विस्तारित बैठकको उदघाटन गर्दै अध्यक्ष खनालले सो कुरा बताउनु भएको हो ।
आइतबार (२९ जनवरी) मा दिल्लीस्थित मूल प्रवाहको केन्द्रीय कार्यालय सरोज भवनमा दुई दर्जन भन्दा बढी नगर समितिबाट उपस्थित प्रतिनिधि तथा पर्यवेक्षकबीच अध्यक्ष खनालले समाजको पश्चिमोत्तर तथा मध्य पश्चिमोत्तर क्षेत्रीय समितिको सयुक्त विस्तारित बैठकको दिप प्रज्वलित गरि उदघाटन गर्नु भएको थियो ।
आगामी २२ र २३ अप्रेल २०२३ मा सम्पन्न हुने दशौं क्षेत्रीय सम्मेलनको तयारीका लागि विस्तारित बैठकको आयोजना गरिएको हो ।
‘प्रवासी नेपालीहरूको मताधिकार र समानुपातिक प्रतिनिधित्वका लागि संघर्ष गरौं । भारतस्थित नेपालीहरूको सामाजिक सुरक्षाको लागि संगठित बनौं’ भन्ने नारासहित क्षेत्रीय सम्मेलनहरु सम्पन्न हुन लागेको खनालले जानकारी दिनुभयो ।
त्यसैगरी विशिष्ट अतिथि बामपन्थी नेता आनन्द शर्माले मूल प्रवाह अखिल भारत नेपाली एकता समाजले सामाजिक रुपमा संगठित गर्दै नेपालको प्रजातान्त्रिक आन्दोलनमा समेत महत्वपूर्ण भूमिका निर्वाह गरिरहेको बताउनु भयो ।
विस्तारित बैठकलाई मूल प्रवाहका केन्द्रीय उपाध्यक्ष कपिल खनाल र नेपाली समाचारका सहसम्पादक धनबीर पुनले पनि सम्बोधन गर्नु भएको थियो ।
कार्यक्रम प्रस्तुत विक्रमसिंह रानाले गर्नु भएको थियो भने विभिन्न नगरबाट उपस्थित प्रतिनिधि एवं पर्यवेक्षकले छलफलमा भाग लिनु भएको थियो ।
बेल बहादुर रजालीको अध्यक्षतामा तथा शिव केसीको सञ्चालनमा सम्पन्न भएको कार्यक्रममा स्वागत शालिकराम आचार्यले गर्नु भएको थियो ।
