सन्धिखर्क । गत मङ्सिर ४ गते सम्पन्न प्रतिनिधि सभा तथा प्रादेशिक तहको निर्वाचनमा बनेको पाँचदलीय गठबन्धनले भूमिकास्थानको ढाकाबाङमा मतदातालाई धन्यवाद ज्ञापन गरेको छ । २०७९ माघ १० गते मङ्गलबार ढाकाबाङको पिपलनेटा बजारमा सो कार्यक्रम सम्पन्न भएको हो ।
कार्यक्रममा बोल्दै राष्ट्रिय जनमोर्चाका केन्द्रीय सदस्य तथा निर्वाचनमा अर्घाखाँची निर्वाचन क्षेत्र १ (क) का वाम–लोकतान्त्रिक गठबन्धनका साझा उम्मेदवार रहेका सागर केसीले कतिपय जिम्मेवार व्यक्तिहरू गठबन्धनको निर्णय कार्यान्वयनतर्फ नलाग्नु तथा नेताले मतदातासँग पहुँच राख्नुभन्दा आर्थिक विषयमा जोड दिनुका कारणले अर्घाखाँचीमा गठबन्धन सफल हुन नसकेको बताउदै यो हार कुनै व्यक्ति, कुनै एक राजनीति दलको नभई सिङ्गो गठबन्धनको हार भएको बताउनुभयो ।
केसीले अर्घाखाँचीमा गठबन्धनलाई विजयको नजिक पु¥याउने मतदाता, शुभचिन्तक, पत्रकार, शिक्षक, कर्मचारी, निर्वाचन प्रमुख र राजनीतिक दल, नेता, जनप्रतिनिधि एवम् सम्पूर्ण कार्यकर्तालाई धन्यवाद दिदै जिल्लाका हरेक विकास निर्माणका काममा सदैव जनता सँगसँगै रहने बताउनुभयो ।
त्यस्तै, राष्ट्रिय जनमोर्चाका केन्द्रीय सदस्य तथा भूमिकास्थान नगरपालिकाका नगर प्रमुख झबिलाल थापाले गत स्थानीय निर्वाचनमा गठबन्धनको साझा उम्मेदवारका रुपमा नगर प्रमुखमा विजय भएको भन्दै समग्र भूमिकास्थान नगरपालिकाको विकासका निम्ति निर्वाचनमा गठबन्धन गरेका दल र अन्य दलसँग सहकार्य गरि अघि बढेको र आगामी दिन पनि अघि बढ्ने बताउनुभयो ।
नेकपा (माओवादी केन्द्र) का भूमिकास्थान नगरपालिकाका उपाध्यक्ष बाबुराम खनालले प्रतिगमनका विरुद्ध बनेको गठबन्धन सरकार गठन प्रक्रियामा तितरबितर भए पनि भूमिकास्थान नगरपालिकामा प्रतिगमनका विरुद्ध बनेको गठबन्धन एकमना एकता कायम रहनुपर्ने बताउनुभयो।
कार्यक्रममा नेपाली काङ्ग्रेस, नेकपा (माओवादी केन्द्र) र राष्ट्रिय जनमोर्चाका नेता, कार्यकर्ता तथा शुभेच्छुकको उपस्थिति रहेको थियो ।
