भक्तपुर । फिरौती रकमका लागि भक्तपुरमा एक ६ वर्षीया बालिकाको अपहरण भएको छ । सूर्यविनायकस्थित ग्लोरी बोर्डिङ स्कुलको युकेजीमा अध्ययन गर्ने ६ वर्षकी बालिका अपहरण परेकी हुन्।
अपहरित बालिकालाई स्थानीयले उद्धार गरेका छन् भने प्रहरीको सक्रियतामा अपहरणकारी पक्राउ परेका छन् । बालिका अपहरण गर्ने सर्लाहीका आशिष थापालाई पक्राउ गरेको प्रहरीले जनाएको छ।
अपहरणकारीले बालिकाको अपहरण गरिसकेपछि १६ लाख रुपैयाँ परिवारसँग माग गरेका थिए । प्रहरीका अनुसार बालिकालाई घ्याम्पेडाँडामा लगेर पछाडि हात बाँधि राखिएको थियो ।
तर बालिका रोइकराइ गरेपछि घुम्न आउने मानिसले रोएको आवाज सुन्ने डरले अपहरणकारी भागेका थिए । सूर्यविनायक गणेश मन्दिर घुम्न गएका मानिसले जंगलमा रोएको देखेपछि बालिकालाई सोधपुछ गर्दा बालिकाले जानकारी गराएकी थिइन् ।
मोटरसाइकल छोडेर भागेका अपहरणकारी पाँच घण्टापछि पक्राउ परेको प्रहरीले जनाएको छ । अपहरणकारी थापामाथि थप अनुसन्धान भइरहेको पनि प्रहरीको भनाई छ ।
