भिवानी । मूल प्रवाह अखिल भारत नेपाली एकता समाजका केन्द्रीय अध्यक्ष ठाकुर खनालले बाबुआमा बितेपछि धर्मका नाममा अनेक संस्कार गर्न आवश्यक नरहेको बताउनुभएको छ ।
मूल प्रवाह नगर समिति भिवानीका अध्यक्ष मोहन सिंह विककी आमा नैनादेवीप्रति श्रद्धाञ्जली दिन आयोजित सभामा खनालले बाबुआमालाई ज्यूँदो छँदा नै सेवा गर्नुपर्ने बताउनु भयो । मृत्युपछि गरिने कतिपय संस्कार कुरीति र शोषणको माध्यम भएको उहाँको भनाई छ ।
‘कैयौंले आमा बुवा जीवित हुँदासम्म कुनै वास्ता नगर्ने, मृत्यु पछि अनेकन संस्कार गर्ने गरेका छन्’ खनालले भन्नुभयो, ‘समाजमा शिक्षाको अभावमा रहेका अन्य जातिहरूमाथि त्यस समयका कथित उच्च जातिहरूको षडयन्त्र र कमाउने माध्यम हो । समाजलाई कुरीतिले जकडेको छ ।’
अध्यक्ष खनालले धर्मलाई अनेकन प्रपञ्च गरि शोषणको माध्यम बनाइएको भन्दै मृत्युपछिका संस्कार आवश्यक नरहेको धारणा राख्नुभयो ।
खनालले भन्नु भयो–‘शास्त्रको नाममा शोषणको जाल हो । मृत्यु भएको घरमा गरुड पुराण पठाउने प्रचलन बावुआमा अगती पर्छन् आत्माले शान्ती मुक्ति पाउँदैन भनी दोहन गरेर आर्थिक लाभ गर्ने उद्धेश्य नै हो ।’ यो संसारमा जे छ, यही छ मृत्यु पछि सबै समाप्त हुने खनालले बताउनु भयो ।
‘स्वर्ग नर्क सबै अन्धविस्वास हो । दानको नाममा आफुलाई लाभ हुने बस्तु स्वीकार गर्ने, अन्यलाई अस्वीकार गर्ने परम्परा छ’ अध्यक्ष खनालले भन्नु भयो, ‘पहिले गाई मूल्यवान हुँदा स्वीकार्य, अहिले हेला भएको सबैलाई अबगत छ ।’ त्यतिमात्र नभई धार्मिक ग्रन्थहरूले समाजमा भेदभाव बढाउने काम गरेको खनालको भनाई थियो ।
सम्पूर्ण मानव जातिले वैज्ञानिक सोचको बिकास गर्नुपर्ने र भौतिकवादी जीवनशैली अपनाउनु पर्नेमा खनालले जोड दिनु भयो ।
बुवा आमाको मुक्तिको नाममा पुरानो संस्कार र लोकराज जोगाउन अनावश्यक अन्धविश्साका कार्यहरु गर्न आवश्यक नभएकोमा उहाँले जोड दिनुभयो ।
खनालले भन्नु भयो–‘यदि पुन्यको काम नै गर्ने हो भने, आफ्नो आर्थिक अवस्थाले भ्याए अनुसार अनाथ आश्रम, वृद्धाश्रम, स्कुल जस्ता सामाजिक कार्यमा सहयोग पुर्याउनु नै सच्चा श्रद्धा हुन्छ ।’
उहाँले मृतक नैनादेवीका साथै क्षेत्रीय सदस्य मणिराम अधिकारीका बुवा मतीराम अधिकारी र पोखरा विमान दुर्घटनामा ज्यान गुमाउनेहरुप्रति पनि एकता समाजको तर्फबाट श्रद्धान्जली प्रकट गर्नु भएको थियो ।
बिबि कोपिलाको अध्यक्षता र भिम बहादुर रायमाझीको सञ्चालनबाट अगाडि बढेको सो श्रद्धाञ्जली सभामा केन्द्रीय सदस्य सालिकराम आचार्य, नगर समितिका डिलबहादुर भट्टराई, नगर अध्यक्ष मोहन सिंह विकले श्रद्धाञ्जली मन्तव्य राख्नुभएको थियो ।
