खिमराज चालीसे, चंडीगढ ।
भारतमा नेपाली श्रमीकको दुर्घटनामा परि मृत्यु र घाइतेका परवारलाई क्षतिपूर्ती दिलाउन मूल प्रवाह अखिल भारत नेपाली एकता समाजले पहल गरेको छ ।
पंजाब राज्यको मुक्त शहरको बठिण्डा वाइपास अर्जुन प्लेसको नजिक सामान किन्न पैदल हिँडिरहेका सात जना नेपाली श्रमिकहरुलाई पछाडिबाट तिब्रगतीमा आएको ईनोवा कारले ठक्कर दिँदा ३ जनाको मृत्यु भएको थियो भने चारजना घाइते भएका थिए । उनीहरुका परिवारलाई मूल प्रवाहले क्षतिपुर्ती दिलाउन पहल गरेको हो ।
घटनाको जानकारी पाउनसाथ घटनास्थल पुगेको मूल प्रवाह नगर समिति बठिण्डाको प्रतिनिधि मण्डल पुलीस थाना र मृतकका आफन्तहरुको बिचमा लगातार तिन दिनदेखि सहकार्य तथा सहयोगमा खटिएको छ ।
प्रतिनिधि मण्डलमा मूल प्रवाह केन्द्रीय सदस्य नरबहादुर ओली, नगर समितिका टेकबहादुर केसी, नारायण केसी, बालाराम जिसी, पप्पु केसी, गिरी बहादुर मगर र खिम बहादुर घर्ती लगाएत रहनुभएको छ ।
सो प्रतिनिधि मण्डल र मृतकका आफन्तहरुलाई आरोपीका आफन्तहरूले नेपाली श्रमीकहरुलाई सामान्य रकम दिएर सम्झौता गर्न लगातार दबाब दिँदै आएको छ । ४–५ लाख रुपैयाँमा सहमति गराउने कोशीस गरे पछि मूल प्रवाहको सुझावमा मृतकका आफन्तहरुले कानुनी लडार्इं लड्ने दृढता व्यक्त गरेको मूल प्रवाह केन्द्रीय सदस्य नर बहादुर ओलीले बताउनु भएको छ ।
सो घटनामा तीन जनाको घटनास्थल मै मृत्यु भएको थियो भने चारजना घाइते भएका थिए । मृत्यु हुनेहरुमा रुपन्देही जिल्ला कञ्चन गाउँपालीका–३ रुद्रपुरका खुमानसिंह थापाको छोरा २० बर्षीय सन्तोष थापा, पर्वत जिल्लाको वियादी गाउँपालिका–३ घर भई हाल बुटबल उपमहानगरपालीका –११ मजुवा बस्ने सुनिल आचार्य र राज कुमारी आचार्यको छोरा १८ वर्षीय रोहित आचार्य र अर्घाखाँची जिल्लाको छत्रकोट गाउँपालिका– २ घर भई हाल बुटबल उपमहानगरपालिका –८ सुख्खानगरका गणेश राना र रेनु रानाका छोरा १८ वर्षीय दिलन राना रहेका छन् ।
घाइते हुनेहरुमा बुटबल उपमहानगरपालीका मिलनचौकका रामु थापाको छोरा २० वर्षीय रोहित थापा ,बुटबल उपमहानगरपालिकाका गंगा चौहानका छोरा १९ वर्षीय समीर चौहान, बुटबल ईटाभट्टीका रामप्रित चौहानका छोरा २२ वर्षीय आकाश चौहान र बुटबल उपमहानगरपालीकाका २८ वर्षीय कुनाल सुनार रहेका छन् ।
मृतकहरुको पोष्टमार्टमपछि प्रशासनले ३ जनाकै शव हस्तान्तरण गरेपछि मंगलबार (१० जनवरी) साँझ परिवारका आफन्तहरूले नेपाल लगेका छन्।
