गोरखा । गोरखामा टिपरको ठक्करबाट एक महिलाको मृत्यु भएपछि आक्रोसित स्थानीयले ठक्कर दिने टिपरमा आगजनी गरेका छन् । स्थानीयले उद्योगभित्र रहेका २६ वटा टिपर र स्काभेटरमा तोडफोडसमेत गरेका छन् ।
गोरखा नगरपालिका–१० स्थित गोरखकाली क्रसर परिसरमा ग १ ख ८०२७ नम्बरको टिपरले किचेर गोरखा नगरपालिका १० अमलापानी बस्ने ५२ वर्षीया मनमाया तामाङको घटनास्थलमै मृत्यु भएको हो । टिपरले ठक्कर दिएकी मनमायालाई ब्याक गरेर किचेको स्थानीयको आरोप छ ।
जिल्ला प्रहरी कार्यालय गोरखाका अनुसार घरबाट छेपेटार बजारमा दुध बेच्न हिँडेकी तामाङलाई शुक्रबार बिहान पौने सात बजे क्रसरबाट निस्केको टिपरले किचेको थियो । तामाङको मृत्यु भएपछि सयौँजनाको आक्रोसित भीडले उक्त टिपरमा आगजनी गरेका छन् भने क्रसरभित्र रहेका २० वटा टिपर र ६ वटा स्काभेटर तोडफोड गरेका हुन् । क्रसर भित्र प्रहरी परिचालन गरिएको छ ।
दोषीमाथि कारबाही र क्षतिपुर्तीको माग गर्दै स्थानीयले अहिले घटनास्थलमा प्रदर्शन गरिरहेका छन्, भने पीडित परिवारले शव उठाउन मानेका छैनन् । स्थानीयले उद्योग बन्द गर्न माग गर्दै प्रदर्शन गरेका प्रहरीले जनाएको छ ।
