अर्घाखाँची । अर्घाखाँचीको भूमिकास्थान नगरपालिकाका प्रमुख झविलाल थापाले पर्यावरण र जनताको स्वास्थ्यमा प्रतिकूल असर पर्नेगरी चुनढुंगा उत्खनन गर्न नदिने बताउनुभएको छ ।
नगरपालिकाको वडा नं ९ सानाडेभामा विजय सिमेन्ट प्रालिले चुनढुंगा उत्खननका लागि चलखेल गरिरहेको भन्दै उहाँले चुनढुंगा खानी सञ्चालन गर्न नदिने स्पष्ट पार्नुभएको हो ।
केही व्यक्तिको व्यक्तिगत जग्गा खरिद गरेर र स्थानीयलाई प्रलोभनमा पारेर सो उद्योगले चुनढुंगाका लागि गरिरहेको चलखेल बन्द गर्न उहाँले आग्रह गर्नुभएको छ ।
‘विजय सिमेन्ट प्रालिद्वारा विभिन्न प्रकारले त्यहाँका उपभोक्ताहरुलाई प्रलोभनमा पारेर त्यहाँको स्थानीय जग्गा खरिद गरेका छौँ भन्ने ढंगले मान्छेलाई जुन भ्रम सिर्जना गरिएको छ, वास्तवमा निजी जग्गा बेच्न पाउनु उसको नैसर्गिक अधिकार हो’ उहाँले भन्नुभयो, ‘तर, निजी जग्गा बेचेँ भन्दैमा त्यसको प्रभाव, वातावरणीय प्रभाव के हुन्छ भन्ने कुरा पनि त्यत्तिकै बुझ्नुपर्ने हुन्छ । राज्य (नगरपालिका) यसमा चनाखो छ । राज्य यो बारेमा एकदम प्रष्ट छ ।’
थापाले निजी जग्गा भएपनि एक अर्कालाई पर्ने असर राज्यको दायित्वभित्र पर्ने भन्दै त्यहाँ चुनढुंगा उत्खनन गर्न नदिने स्पष्ट पार्नुभएको छ ।
थापाले भन्नुभयो, ‘त्यहाँको चुनढुंगा उत्खनन कार्यलाई हामी कुनै पनि हालतमा अघि बढाउन दिँदैनौँ । किन दिँदैनौँ भने यसमा पर्यावरणीय हिसाबले, बाटोको हिसाबले पार्ने प्रभावबारे नगरपालिका प्रष्ट छ । र, अझ त्यहाँ चारवटा खानेपानीका मुहान भएका कारणले चारवटा खोपानी आयोजना उपभोक्ता समितिका मान्छेहरु निवेदन लिएर उत्खनन गर्न पाइँदैन भनेर नगरपालिकामा डेलिगेसन लिएर आइसक्नुभएको छ । त्यसकारण त्यो डेलिगेसनमाथि पनि सिंगो भूमिकास्थान नगरपालिकाको ध्यानाकर्षण भएको छ ।’
थापाले त्यहाँ रहेका चारवटा खानेपानी आयोजनाका मुहान, त्यहाँको बस्ती तथा पर्यटन हबको विकासका लागिसमेत चुनढुंगा उत्खनन उपयुक्त नहुने स्पष्ट पार्नुभयो ।
उहाँले आफूहरु विकासविरोधी नभएको भन्दै चुनढुंगा उत्खनन गर्न कुन ठाउँ उपयुक्त छ भन्ने कुरा गहिरो अध्ययन गरेर उपयुक्त ठाउँमा जान पनि विजय सिमेन्टलाई आग्रह गर्नुभयो । जनतालाई तत्कालिन र दीर्घकालिन रुपमा असर पार्नेगरी, भावी सन्ततीलाई खण्डहर भूमिकास्थान हस्तान्तरण गर्नेगरी आफूले काम नगर्ने पनि उहाँले प्रतिवद्धता जनाउनुभएको छ ।
(भिडिओ : अजय केसी/सामाजिक सञ्जालबाट)
