काठमाडौं । विद्युतीय राहदानीको सर्भरमा देखिएको समस्या हल गर्न फ्रान्सबाट प्राविधिक टोली आउने भएको छ । फ्रान्सेली टोली सोमबार नेपाल आउने राहदानी विभागले जनाएको छ ।
मलेसिया र भारतको बंगलोरबाट बिहीबार नेपाल आएको प्राविधिक टोलीले सर्भरमा आएको समस्या हल गर्न नसकेपछि फ्रान्सबाट टोली आउन लागेको हो । फ्रान्सेली कम्पनी आइडिमीयाको टोली सोमबार नेपाल आउने तयारी रहेको विभागका एक अधिकारीले बताए ।
आइडिमिया र विभागबीच भएको सम्झौता अनुसार उसले नेपालमा २०७८ मंसिर महिनादेखि राहदानी छपाई गर्दै आएको छ । त्यसअघि फ्रान्सकै अर्को कम्पनी ओबर्थरले नेपालमा राहदानी छपाई गर्ने गथ्र्यो ।
यही पुस १७ गतेदेखि राहदानी विभागको ‘सिस्टम’मा समस्या आइ राहदानी छपाई तथा वितरण कार्य अवरुद्ध हुन गएको’ विभागले गत मंगलबार जनाएको थियो ।
प्रधानमन्त्री पुष्पकमल दाहाल प्रचण्डले राहदानी, राष्ट्रिय परिचय पत्र र सवारी चालक अनुमति पत्रका लागि घण्टौँ लाइन बस्नुपर्ने बाध्यता रहेको भन्दै अब दोहोरिए कारबाही गर्ने चेतावनी दिएको केही दिनमै यस्तो समस्या देखिएको हो ।
