नयाँ दिल्ली । मूल प्रवाह अखिल भारत नेपाली एकता समाज दक्षिण भारत क्षेत्रीय समिति अन्तर्गत रक्तिम सांस्कृतिक अभियानका कलाकार विजय पहरीको दुर्घटनामा निधन भएको छ ।
विद्यार्थी विभाग वेंगलोर उत्तर नगर समितिका अध्यक्ष २२ वर्षीय पहरीको मोटरसाइकल दुर्घटनामा परी निधन भएको मूल प्रवाहले जनाएको छ ।
उनी मूल प्रवाह अखिल भारत नेपाली एकता समाज दक्षिण भारत क्षेत्रीय समितिका सदस्य एवं वेंगलोर उत्तर नगर समितिका अध्यक्ष धरम पहरी र महिला क्षेत्रीय विभागकी सदस्य दुरा पहरीका कान्छा छोरा हुन् ।
विजय र उनका एक स्थानीय साथी गत ३१ डिसेम्बरको साँझ करिव ६ बजे मैसूरबाट पिकनिक सकि आफ्नो निवास वेंगलोरतर्फ मोटर साइकलमा फर्किने क्रममा वेगंलोरको दुरे भन्ने स्थानमा ट्रकले ठक्कर दिएको थियो । सँगै रहेका स्थानीय साथीको घटनास्थलमै मृत्यू भएको थियो भने विजयलाई टाउकोमा गम्भीर चोट लागेको थियो ।
उनको वेंगलोरको ताउडा केरेस्थित हेल्थ इण्डियन हस्पिटलमा उपचारका क्रममा आज (२ जनवरी) का दिन निधन भएको हो । उनको हिजो टाउकाको अप्रेसन गरेपनि चिकित्सकले बचाउन सकेनन् । गए राति २ः३० बजे विजयको निधन भएको डाक्टरहरुले घोषणा गरेका छन् ।
पहरी परिवार स्वदेशमा बैतडी जिल्ला पाटन नगरपालिका वडा नः ६, स्थायी निवासी हुनुहुन्छ । विकम अध्ययन गरि भर्खर मात्रै उनी रोजगारीमा लागेका थिए ।
विजयको निधनप्रति मूल प्रवाहका केन्द्रीय अध्यक्ष ठाकुर खनालले गहिरो दुःख व्यक्त गर्नुभएको छ ।
शोक विज्ञप्ति प्रकाशित गरी खनालले भन्नुभएको छ, ‘विजय पहरीको निधनले हाम्रो सिंगो संगठन मूल प्रवाह अखिल भारत नेपाली एकता समाजमालाई अपूरणीय क्षति पुगेको छ । उहाँको निधनले सिंगो संगठनलाई स्तब्ध र मर्माहित बनाएको छ । मृतक विजय पहरीप्रति भावपूर्ण श्रद्धाञ्जली प्रकट गर्दै यो दुःखद घडिमा परिवारजनमा असह्या पीडाप्रति गहिरो समवेदना प्रकट गर्दछौं । एवं धैर्यधारणाको कामना गर्दछौं ।’
त्यस्तै, दक्षिण भारत क्षेत्रीय समितिका सचिव जनकराज शर्माले शोक वक्तव्य जारी गरि गहिरो दुःख व्यक्त गर्नुभएको छ । शर्माले परिवारमा पर्न गएको दुःखको यस घडीमा समवेदना प्रकट गर्दै धैर्यधारणाको कामना प्रकट गर्नुभएको छ ।
