काठमाडौं । नेपाल टी २० लिगमा विराटनगर सुपर किंग्ससँग पोखरा एभेन्जर्सले हार व्यहोरेको छ । बुधबार भएको खेलमा पोखरा विराटनगर सुपर किंग्ससँग ६ विकेटले पराजित हुँदै अंक तालिकाको पुछारमा छ । खराब प्रदर्शन गरिरहेको पोखरा एभेन्जर्सले लगातार चौथो हार व्यहोरेको छ ।
पोखराले दिएको १४० रनको लक्ष्य विराटनगरले १७.५ ओभरमा ४ विकेट गुमाएर भेट्टायो । विराटनगरका लागि हुसैन तलातले सर्वाधिक ५० रनको योगदान दिए । तलातले ३० बलमा ४ चौका र १ छक्का हाने ।
विवेक यादव १४ रनमा नटआउट रहे। अर्जुन साउदले २५ र एन्ड्रीले २१ रन थपे। पृथु बास्कोटाले १५ रन बनाए । पोखराका लागि कुशल मल्ल र शरद भेषावकरले समान २ विकेट झारे ।
त्यसअघि कीर्तिपुरस्थित त्रिवि क्रिकेट मैदानमा विराटनगरले टस जितेर फिल्डिङ रोजेपछि ब्यािटङ गरेको पोखराले निर्धारित १९ ओभरमा ८ विकेटको क्षतिमा १ सय ३९ रनको योगफल तयार पारेको थियो ।
पहिलो खेल सुपर ओभरमा धकेलिएपछि यी दुई टोलीबीचको खेलमा समान एक ओभर घटाइएको थियो । पोखराका लागि कुशल मल्लले सर्वाधिक ३७ रनको योगदान दिए। १८ बलको सामना गरेका उनले ३ चौका र ३ छक्का हाने। सिद्धान्त लोहनीले २६ रन थपे। कप्तान उपुल थराङ्गा १० रनमा आउट भए ।
ओपनर सुमित महर्जनले १२ र आशिफ शेखले १० रन थपे । आरिफ शेख ३ रनमा बोल्ड आउट भए। अभिमन्यु मिथ्युम १ रनमा क्याच आउट भए। शरद भेषावकर ९ र प्रतिश जिसी ११ रनमा नटआउट रहे ।
विराटनगरका लागि हुसैन तलात र राज ननानले समान २ विकेट लिए । नन्दन यादव, एन्ड्री र सहाव आलमले समान १ विकेट आफ्नो नाममा गरे ।
