काठमाडौं ।
कहिले हामी हारौँला साथी
कहिले जितौँला,
जिन्दगीभरी मुक्तिको बाटो
निरन्तर हिँडौँला
रक्तिम सांस्कृतिक अभियानका अध्यक्ष सहित्यकार गिरीप्रसाद बुढाका शब्द हुन् यी।
बुढाले लेखेको यो गितलाई रक्तिमकै उपाध्यक्ष एवम् जनवादी गायक हेमराज आश्रमले संगीतवद्ध गर्नुभएको छ भने हेमराजकै स्वरमा गीत रेकर्ड गरिएको छ । गायक हेमराजलाई रक्तिमकी केन्द्रीय सदस्य जनवादी गायिका मेस्मा पुनले साथ दिनुभएको छ ।
विविध विधामा कलम चलाउने अध्यक्ष बुढाको यो गीत भने पहिलो पटक रेकर्ड गरिएको हो । गीतले नयाँ जनवादी क्रान्तिको भविष्य उज्वल रहेको भन्दै नआत्तिन र नमात्तिन सन्देश दिएको छ ।
अँध्यारो भित्र उज्यालो खोज्न
मशाल बालौँला,
विशाल शक्ति निर्माण गरी
अन्याय ढालौँला
हार्दैमा हामी हरेश खान्नौँ
जित्दैमा मात्तिनौँ
हजारौँ कष्ट ब्यहोर्छौं हामी
कदापी आत्तिन्नौँ ।
मंगलबार यूएलपी नेपाल युट्युब च्यानलबाट सार्वजनिक गरिएको सो गीत शब्द जस्तै स्वर संगीतमा पनि सशक्त रहेको सुनिन्छ।
रक्तिम सांस्कृतिक अभियान रूकुम पश्चिमको पहिलो कोसेलीको रुपमा मुक्तिको बाटो सार्वजनिक गर्न पाउँदा अत्यन्त गौरव अनुभूति भएको अध्यक्ष बुढाले बताउनुभएको छ ।
