काठमाडौं । नेपाल कम्युनिस्ट पार्टी(मसाल) ले गठबन्धनका विभिन्न पक्षहरुले एमालेसित मिलेर सरकार बनाउने प्रयत्न गरेको भन्दै त्यसको विरोध गरेको छ ।

एमालेसँग मिलेर सरकार बनाउने प्रयत्न भए पाँच दलीय गठबन्धनद्वारा प्रतिगमनका विरुद्ध चलाइएको संयुक्त आन्दोलनसित घात हुनेछ र त्यसका देशको राजनीतिमा गम्भीर प्रकारका दुष्परिणाम हुने मसालको ठहर छ ।

महामन्त्री मोहनविक्रम सिंहले आइतबार जारी गर्नुभएको वक्तव्यमा एमालेसहितको सरकार बनेमा सरकारलाई पार्टीको समर्थन नरहने कुरा पनि स्पष्ट पार्नुभएको छ ।

यस्तो छ वक्तव्य :
‘आम चुनाव सम्पन्न भएपछि सरकारको गठनमा उत्पन्न भएको समस्या र जटिलताप्रति ने.क.पा.(मसाल)को गम्भीर ध्यान आकर्षित भएको छ । सुरुदेखि नै हाम्रो जोड यो कुरामा रहेको छ कि अहिलेको राजनीतिक स्थितिमा गठबन्धन कायम रहनुपर्छ र गठबन्धको सरकार बन्नु नै सबैभन्दा उपयुक्त कुरा हुनेछ ।

तर अहिले सरकारको गठन र सरकारको नेतृत्वको प्रश्नमा गठबन्धनभित्र उठिरहेको विवादप्रति पनि हाम्रो पार्टीको ध्यान आकर्षित भएको छ । उक्त विवादका कारणले सरकारको गठनमा सहमति हुन नसकेमा त्यसका देशको राजनीतिमा कैयौँ दुष्परिणाम हुनेछन् । त्यसैले गठबन्धनसित सम्बन्धित पक्षहरुका बिचमा सरकारको गठनको लागि सहमति बनोस् भन्ने हाम्रो जोड छ ।

गठबन्धनलाई पूरा बहुमत प्राप्त हुने छ भन्ने कुरामाथि हामीलाई पूरा विश्वास थियो । गठबन्धनसित सम्बन्धित पक्षहरुको वस्तुगत अवस्थामाथि विचार गर्दा यो सम्भावना पनि थियो । तर गठबन्धनभित्रका कतिपय पक्षहरुको अन्तरघातका कारणले चुनावमा प्रतिगमनलाई पराजित गर्न सफलता प्राप्त भए पनि सरकार बनाउनको लागि बहुमत प्राप्त हुन सकेन ।

त्यसले गर्दा सरकार बनाउनको लागि बहुमत पु¥याउन अहिले बेग्लाबेग्लै दिशामा प्रयत्न हुन थालेको पाइन्छ । त्यो क्रममा गठबन्धनका बेग्लाबेग्लै पक्षहरुले एमालेसित मिलेर सरकार बनाउने प्रयत्न गरेका कुरा पनि सञ्चार माध्यमहरुमा प्रकाशित हुने गरेका छन् । त्यस प्रकारको कुनै पनि कारणले गठबन्धनमा फुट भयो वा एमालेसँग मिलेर सरकार बनाउने कार्य गरियो भने ५ दलीय गठबन्धनद्वारा प्रतिगमनका विरुद्ध चलाइएको संयुक्त आन्दोलनसित घात हुनेछ र त्यसका देशको राजनीतिमा गम्भीर प्रकारका दुष्परिणाम हुनेछन् । एमालेसँग मिलेर सरकार बनाउने त्यस प्रकारका कुनै पनि प्रयत्नलाई हामीले गलत ठान्दछौं र विरोध गर्दछौं । त्यसरी बन्ने कुनै पनि सरकारलाई हाम्रो समर्थन नरहने कुरा पनि हामीले स्पष्ट गर्न चाहन्छौं ।

अहिले प्रधानमन्त्री पदको लागि चलिरहेको विवादको सन्दर्भमा कसलाई प्रधानमन्त्री बनाउन सही हुनेछ ? त्यसबारे हाम्रो कुनै राय छैन । तर जो प्रधानमन्त्री बने पनि गठबन्धन भित्रबाट नै बन्नु पर्दछ र त्यो विवादका कारणले गठबन्धनमा कुनै फुट हुनुहुन्न भन्ने हाम्रो स्पष्ट मत छ । त्यही प्रकारले राष्ट्रपतिको चयन गैरदलीय व्यक्तिबाट बनाउनुपर्छ भन्ने विचारलाई हामीले गलत मान्दछौं र विरोध गर्दछौं ।’
२०७९ पौष ०३ गते ।
मोहनविक्रम सिंह
महामन्त्री