काठमाडौं । नेपालस्थित अमेरिकी दूतावासले एमसीसी परियोजनामा कुनै पनि सैन्य मामिला नजोडिएको बताएको छ । शुक्रबार अमेरिकी राजदूत रेन्डी बेरीले यसबारे १० बुँदा सार्वजनिक गर्दै एमसीसीमा कुनै सैन्य मामिला नजोडिएको दाबी गरेका हुन् ।एमसीसीका प्रावधानहरु इन्डोप्यासिफिक रणनीति अन्तर्गत आएका र यसमा सैन्य प्रावधान जोडिएको विषयबारे बहस भइरहँदा दूतावासले यसको खण्डन गरेको हो ।

‘एमसीसीमा कुनै पनि सैन्य मामिला जोडिएको छैन। वास्तवमा अमेरिकी कानुनले कुनैपनि एमसीसी परियोजनामा सैन्य संलग्नतालाई निषेधित गरेको छ। एमसीसीमा सहभागी हुनका लागि नेपालले कतै पनि सम्मिलित हुनुपर्दैन वा हस्ताक्षर गर्नुपर्दैन’ दूतावासद्वारा शुक्रबार जारी विज्ञप्तिमा भनिएको छ।दूतावासले यो विशुद्धरूपमा आर्थिक विकासमा केन्द्रित भएको बताएको छ। विद्युत लाइन निर्माण र सडकको स्तरोन्नतिमार्फत आर्थिक विकासलाई सघाउने परियोजनाको लक्ष्य रहेको पनि दूतावासले स्पष्ट पारेको छ।

We all have been hearing & reading a lot about the Millennium Challenge Compact or @MCCgov lately. Here are 10 facts about @MCA_Nepal that I thought everyone should know – like that all the projects were selected by #Nepal w/ their own priorities for economic development in mind! pic.twitter.com/xIT5VFdYny

— Ambassador Randy Berry (@USAmbNepal) January 17, 2020

यस्तै, एमसीसीमा कुनै स्वार्थ नलुकेको दाबी गर्दै दूतावासले यस अन्तर्गतका परियोजना नेपाल आफैले छनौट गर्ने पनि जनाएको छ । ‘यो ५० करोड डलर एक अनुदान हो, जसमा कुनै स्वार्थ छैन, ब्याजदर छैन, वा कुनै लुकेको प्रावधान छैन। नेपालले गर्नुपर्ने भनेको सहमति भइसकेका परियोजनाहरूमा उक्त रकम पारदर्शी रूपमा खर्च गर्न प्रतिबद्ध हुनु मात्र हो’ उसले भनेको छ । एमसीसीका सर्तहरुबारे नेपालमा चलेका बहस र उठेका प्रश्नबारे भने दूतावासले स्पष्ट पारेको छैन ।