काठमाडौं । नेकपा (मसाल) का महामन्त्री मोहनविक्रम सिंहले देशमा विदेशी भूमिका बढेर गएको बताउनुभएको छ । राजधानीमा आयोजित एक छलफल कार्यक्रममा बोल्दै महामन्त्री सिंहले हालै सम्पन्न निर्वाचनमा विदेशीको भूमिका झन् बढी देखिएको बताउनुभयो ।
विभिन्न साम्राज्यवादी शक्तिहरुले आ–आफ्नो अनुकुलका पार्टी वा व्यक्तिलाई निर्वाचन जिताउन चलखेल गरेको सिंहको आरोप छ । संसदमा आफू अनुकुलका व्यक्तिहरुलाई ल्याउन अमेरिकी तथा भारतीय साम्राज्यवादले चलखेल गरेको सिंहको भनाई थियो ।
राष्ट्रिय जनमोर्चालाई संसदमा आउन नदिने साम्राज्यवादीहरुको षडयन्त्र असफल भएको पनि सिंहले बताउनुभयो । चौतर्फी घेराबन्दीका बावजुद बागलुङबाट चित्रबहादुर केसीले चुनाव जित्नु साम्राज्यवादीको योजना असफल हुनु हो भन्नुभयो ।
उहाँले एमसीसी र एसपीपीको विरोध गर्ने दल राष्ट्रिय जनमोर्चालाई अमेरिकी साम्राज्यवादले संसदमा देख्न नचाहेको पनि स्पष्ट पार्नुभयो । यस्तै, नागरिकता विधेयकको विरोध, संघीयता र भारतीय हस्तक्षेपको लगातार विरोध गरेका कारण राजमोका प्रतिनिधि संसदमा नआउन् भन्ने भारतीय पक्षको प्रयास रहेको सिंहको भनाई थियो ।
‘हामीले अमेरिकी–भारतीय साम्राज्यवादको विरुद्ध लगातार संघर्ष गरिरहेका छौँ । एमसीसी, एसपीपी, नागरिकता विधेयक जस्ता राष्ट्रघाती प्रावधानको विरोध गरेका छौँ’ सिंहले भन्नुभयो, ‘विदेशी साम्राज्यवादी शक्तिहरुलाई नेपालमा सबैभन्दा बढी बिझाउने भनेको नेकपा (मसाल) हो । त्यसकारण हाम्रा प्रतिनिधिहरुलाई संसदमा आउन नदिन उनीहरु पुरा जोड लगाउँछन् ।’
