मस्कट । ओमनमा रहेका नेपाली सङ्घसंस्था तथा राजदूतावासले त्यहाँको बाउन्नौँ राष्ट्रिय दिवस मनाएका छन् । २०७९ मङ्सिर ९ गते तदनुसार नोभेम्बर २५, २०२२ शुक्रबारका दिन सो कार्यक्रम मनाइएको हो ।

कार्यक्रममा नेपाली मौलिक पञ्चेबाजा, विभिन्न परम्परागत भेषभूषा तथा नेपालको अन्य मौलिक तथा पर्यटकीय आकर्षण प्रदर्शन गरिएको थियो। पञ्चेबाजा बजाउने वादकहरू नेपाली दौरा–सुरुवालसहितको राष्ट्रिय पोसाकमा सजिनुभएको थियो भने तामाङ, गुरुङ र मगर समुदायले आफ्नो परम्परागत भेषभूषा तथा झाँकी प्रदर्शन गर्नुभएको थियो । साथै कार्यक्रममा सहभागी अन्यले “नेपाल–ओमन सम्बन्ध अमर रहोस् !” लेखिएको र नेपाल र ओमानको झन्डाअङ्कित नेपाल र ओमानको झन्डाकै रङमा बनाइएको विशेष टिसर्ट लगाएका थिए ।
कार्यक्रम नेपाली राजदूतावास नजिकबाट सुरु भएर नजिकैको समुद्री किनार हुँदै करिब तीन किमि अगाडि रहेको परराष्ट्र मन्त्रालयनजिकको खुल्ला स्थान अगाडि गएर टुङ्गिएको थियो ।

शुक्रबार सार्वजनिक बिदाको दिन भएकोले समुद्री किनारमा मानिसको भिडभाड रहेको थियो भने बाटोमा पनि धेरै मानिसले चाख लिएर हेरिरहेका थिए । सहभागिताका लागि वाकाथनको रुटमा पर्ने समुद्री किनार आसपासका करिब १५ ओटा रेस्टुरेन्ट तथा त्यहाँ उपस्थित ग्राहकलाई सहभागी हुन अनुरोध गरिएकोमा उल्लेख्य सहभागिता रहेको थियो । विशेष गरी पाँचतारे होटल इन्टरकन्टिनेन्टल र होटलबाट समेत पाहुनाहरू सहभागी थिए ।

कार्यक्रमको अन्त्यमा ओमनस्थित नेपाली राजदूत डोरनाथ अर्यालले शुभकामना सन्देश दिनुभएको थियो ।

ओमानमा नेपाली समुदायले पहिलोपटक आयोजना गरेको यस प्रकृतिको कार्यक्रममा आमन्त्रित पत्रकार तथा अन्य सहभागी, महामहिम राजदूतलगायत सम्पूर्ण दूतावास परिवार तथा ओमानस्थित नेपाली सङ्घसंस्थाका पदाधिकारी एवम् ओमानमा बस्ने नेपालीहरू गरी करिब ४०० सहभागीको उपस्थिति रहेको थियो ।

कार्यक्रममा ओमान प्रहरीले स्कर्टिङ गरेको थियो भने आपतकालीन अवस्थाको लागि बदरअलसमा अस्पतालको सहयोगमा एउटा एम्बुलेन्स उपलब्ध गराइएको थियो ।

कार्यक्रमको आयोजक नेपाली राजदूतावास, ओमान नेपाली एकता समाज, नेपाली सोसल क्लब, जनसम्पर्क समिति, नेपाली जनप्रगतिशील मञ्च, नेपाली एकता मञ्च, प्रवासी नेपाली सङ्घ, प्रवासी नेपाली एकता समाज (पानस), तमु समाज, नेपाल मगर सङ्घ, दलित एकता समाज, बागलुङ सेवा समाज, मोरङ सुनसरी सेवा समाज, नेपाली समाज, नेपाली महिला समूह, गुल्मी सेवा समाज, नेपाल तामाङ समाज, बुद्ध भिजन, पाल्पाली परिवार, म्यादी प्रवासी नेपाली मञ्च, अन्तर्राष्टिय साहित्य च्याप्टर, रक्तदान समूह, सगरमाथा समूह, झापाली समाजलगायत रहेका थिए ।