नवराज पौडेल, कपिलवस्तु ।
कपिलवस्तुको शिवराज नगरपालिका भित्र रहेका सहकारीहरुको चौमासिक समीक्षाको बारेमा शिवराज नगरपालिकाले आज एक कार्यक्रम गरि सम्पन्न गरेको छ । शिवराज नगर कार्यपालिका सदस्य शान्त सेनको अध्यक्षतामा भएकाे कार्यक्रममा नगर प्रमुख नेत्रराज अधिकारीकाे प्रमुख आतिथ्यता रहेको थियो ।
कार्यक्रमलाई सम्बोधन गर्दै नगर प्रमुख अधिकारीले सहकारीलाई नगरपालिकाले उच्च महत्व दिएकाे बताउनुभयाे । सरकारको आर्थिक नीतिमा सहकारीको भूमिका महत्वपूर्ण रहेको बताउँदै देशभर ६० लाख मानिस सहकारीमा आबद्ध रहेको जानकारी पनि दिनुभयाे ।
यस्तै, नगरपालिकाका प्रशासकीय अधिकृत हरी प्रसाद अर्यालले नगरपालिकामा ४८ सहकारी संस्थाको रेकर्ड भएपनि ३५ सहकारी संस्थाले मात्र नियमित रूपमा रिपोर्ट दिएको बताउनु भयो । अन्य निष्क्रिय रहेको सहकारी संस्थालाई समेत नियमित रिर्पोटका लागी आग्रह गर्दै सहकारी संस्थाहरुलाई नियमन गर्ने, दर्ता गर्ने, खारेज गर्ने, प्रबन्धन गर्ने जिम्मा नगरपालिकालाई रहेकोले समयमै नगरपालिकामा रिर्पोट बुझाउन अनुरोध गर्नुभयो । अर्यालले सबै सहकारीले आर्थिक कारोबार व्यवस्थित गर्न कप्यूटर प्रणाली अनिवार्य गरिएको बताउँदै कम्प्युटरबाट गरिएको कारोबार जिल्ला, प्रदेश, केन्द्रसम्म संस्थाको रिपोर्ट हेर्न सकिने बताउनुभयो ।
कार्यक्रममा सहकारीका प्रतिनिधिले नगरपालिकाले कृषि सहकारी र बचत ऋण सहकारी लाई कसरी हेरेको छ ? अनुदान के के छन् भन्ने खालका विषयमा प्रश्न गरेका शिवराज कृषि सहकारी संस्था लिमिटेड खरेन्द्रपुरका अध्यक्ष केयर सिंह अदैले जानकारी दिनु भएको छ ।
अशोक पाण्डेको सञ्चालन र नगरपालिका राजस्व प्रमुख लक्ष्मी कँडेलको स्वागत मन्तव्यमा सम्पन्न भएको कार्यक्रममा नगरपालिकाका कृषि विकास अधिकृत तारा चन्द चौधरीलगाएतले सम्बोधन गर्नु भएको थियो ।
