(फोटो : एपी)
काठमाडौँ । फिफा विश्वकप फुटबल प्रतियोगिता आजदेखि कतारमा सुरु हुँदै छ । करिब ६० हजार दर्शक क्षमता भएको अलबायत स्टेडियममा विश्वकपको आज उद्घाटन हुने छ ।
उद्घाटन खेलमा कतार र इक्वेडरबिच प्रतिस्पर्धा हुने छ । समूह ए मा रहेको कतार र इक्वेडरबिचको खेल नेपाली समयअनुसार आज राति ९:४५ बजेदेखि सुरु हुने छ ।
कतार र इक्वेडर दुवै टोली उद्घाटन खेलमा जित निकाल्दै विश्वकपमा सुखद सुरुआत गर्ने योजनाका साथ मैदानमा उत्रने छन् । मध्यपूर्वको मुस्लिम राष्ट्रमा पहिलोपटक आयोजना हुन लागेको विश्वकपको उद्घाटन खेलअघि औपचारिक उद्घाटन समारोह हुने छ ।
आयोजक कतारको समूहमा नेदरल्यान्ड, इक्वेटर र सेनेगल छन् । विश्वकपमा ३२ राष्ट्रले प्रतिस्पर्धा गर्दै छन् । सहभागी राष्ट्रलाई आठ समूहमा विभाजन गरिएको छ ।
कतारका आठओटा रङशालामा आयोजना हुने विश्वकपको समूह बी मा इङल्यान्ड, इरान, अमेरिका र वेल्स छन् भने समूह सी मा अर्जेन्टिना, साउदी अरेबिया, मेक्सिको र पोल्याण्ड छन् ।
त्यस्तै, समूह डी मा फ्रान्स, अस्ट्रेलिया, डेनमार्क र ट्युनिसिया छन् । समूह ई मा स्पेन, कोस्टारिका, जर्मनी र जापान छन् । त्यसैगरी, समूह एफ मा बेल्जियम, क्यानडा, मोरक्को र क्रोएसिया छन् भने समूह जी मा ब्राजिल, सर्बिया, स्विट्जरल्यान्ड र क्यामरुन छन् ।
समूह एचमा पोर्चुगल, घाना, उरुग्वे र दक्षिण कोरिया छन् ।
हरेक समूहका शीर्ष दुई टोलीले नकआउट चरणमा स्थान बनाउने छन् । विश्वपकपको फाइनल खेल आगामी पुस ३ गते हुने छ ।
