काठमाडौं । सरकारले चुनाव बहिष्कार गर्ने समूहलाई निगरानीमा राखेर कारबाही गर्ने चेतावनी दिएको छ । पछिल्लो केही दिनयता निर्वाचन बहिष्कारका नाममा हिंसात्मक घटना हुन थालेको भन्दै गृह मन्त्रालयले कारबाही गर्ने तयारी थालेको हो ।
शुक्रबार निर्वाचन पूर्वतयारीका सन्दर्भमा मन्त्रालयले आयोजना गरेको पत्रकार सम्मेलनमा गृहले बहिष्कारका नाममा हिंसात्मक गतिविधि देखिन थालेको भन्दै कडाइका साथ कारबाही गर्ने जनाएको हो ।
गृह सचिव विनोद प्रकाश सिंहले भने, ‘चुनाव बहिस्कार गर्ने समूहसँग हामी एग्रेसिव थिएनौं तर केही दिन यता हिंसात्मक देखियो । अब कडाइका साथ कारबाही अगाडि बढाउछौं ।’
बहिष्कार गर्ने समूह देशभर प्रहरीको निगरानीमा रहेको समेत उनको भनाई छ । निर्वाचनमा भौतिक क्षति हुन नदिन सरकारले सुरक्षा निर्देशन दिइसकेको उनले बताए ।
केही दिन यता देशका विभिन्न ठाउँमा शंकास्पद वस्तु फेला परेको र भोजपुर तथा बाँकेमा बम विस्फोट भएपछि गृहले सतर्कता बढाएको हो । नेत्रविक्रम चन्द ‘विप्लव’ नेतृत्वको नेकपासहित केही वामपन्थी समूहहरुले निर्वाचन बहिष्कार गरेका छन् ।
सरकारले नेपाली सेनाको ९०३ वटा बम डिस्पोजल टोली फिल्डमा खटिने जनाएको छ । यस्तै, मन्त्रालयले अन्य गाडी सम्भव भएसम्म सुरक्षा निकायका गाडीमा मतपेटिका ढुवानी नगर्ने जनाएको छ । ४० स्थानबाट मतपेटिका हेलिकप्टरबाट ढुवानी गर्ने सरकारको तयारी छ।
गृह मन्त्रालयले चुनावमा निजाी क्षेत्रका हेलिकप्टर तयारी अवस्थामा राख्नसमेत निर्देशन दिएको छ । हिमाली र उच्च पहाडी भागबाट मत पत्र संकलनमा हेलिकप्टर प्रयोग गर्ने सरकारको तयारी छ ।
