जापान । जापानमा एक नेपाली महिलाको चक्कु प्रहार गरी हत्या भएको छ । इसेसाकी शहरको अपार्टमेन्टमा बस्ने ४२ वर्षीय लक्ष्मीकुमारी बस्नेत अधिकारीमाथि चक्कु प्रहार गरि हत्या गरिएको हो ।
जापानको सार्वजनिक संचारमाध्यम एनएचकेले आफ्नो समाचारमा उल्लेख गरे अनुसार चक्कु बोकेका एक व्यक्ति उक्त घटनास्थलबाट निस्केको देखिएकाले अधिकारीको हत्या भएको हुन सक्ने आशंका गरिएको छ । घटनाबारे अनुसन्धान भैरहेको र ती व्यक्तिको खोजी भैरहेको प्रहरीले जनाएको छ ।
बुधबार राति करिब ११ः३० बजे इसेसाकी शहरको ओटा–चोमा रहेको सो अपार्टमेन्टमा बस्ने अर्कों एकजनाले ‘कुनै समस्या भएको जस्तो देखिन्छ’ भनेर प्रहरीलाई जानकारी गराएसँगै सो हत्या गरेको भेटिएको प्रहरीले जनाएको छ ।
प्रहरीले अपार्टमेन्टमा पुग्दा दोस्रो तल्लाको कोठाको प्रवेशद्वारमा रगत बगिरहेको अवस्थामा घाइते अधिकारीलाई भेटेको र उनलाई अस्पताल पुर्र्याउनासाथ अस्पतालले मृत्यु भएको पुष्टि गरेको थियो ।
प्रहरीले गरेको अनुसन्धानबाट नेपाली नागरिकता भएकी अधिकारी आंशिक कर्मचारीको रूपमा काम गर्ने गरेकी देखिएबाट उनी आश्रित भिसामा जापानमा रहेको हुनसक्ने बताइएको छ ।
उनको शरीरमा चक्कु प्रहार गरी चोट लागेको प्रहरीले जनाएको छ । साथै चक्कु लिएर एकजना व्यक्ति पनि घटनास्थलबाट निस्किएको देखेकोले प्रहरीले हत्या मुद्दाका रूपमा फरार भएको व्यक्तिको खोजी गरिरहेको छ । मंगलबार राति चक्कु बोकेको एक व्यक्ति पनि घटनास्थल वरिपरि देखिएको बताइएको छ ।
३० वर्षकी एक अर्की महिला जसले आफ्नो श्रीमानले एकजना मानिसलाई चक्कु बोकेको देखेको बताएकी थिइन् । उनले भनिन् ‘घटनास्थलबाट करिब १०० मिटर टाढा ड्राइभ गरिरहेको बेला चक्कु बोकेको मानिस देखेको मैले मेरो श्रीमानबाट सुने। त्यो चक्कु अलि लामो थियो र त्यसमा रगत जस्तै देखिने केही लागेको थियो।’
प्राप्त जानकारी अनुसार मृतक अधिकारीको नेपालको घर बुटवल रहेको र माइती बागलुडको गलकोट रहेको बताइएको छ । मृतक अधिकारीको श्रीमान जापानमा रहेका र उनको १७ वर्षीय छोरा नेपालमा रहेको आफ़न्तले बताएका छन् ।
प्रहरीले अनुसन्धान गरिरहेको र अनुसन्धानका लागि आवश्यक सहयोग पुर्याइदिन मृतकको परिवारलाई आग्रह गरेको छ । जापानमा यो सँगै यसै हप्ता ३ जना नेपालीको मृत्यु भएको छ ।
