दाङ । राष्ट्रिय जनमोर्चाका कार्यकारी अध्यक्ष रश्मीराज नेपालीले सीमा अतिक्रमणको विषयलाई तत्काल अन्तर्राष्ट्रियकरण गर्नुपर्ने बताउनुभएको छ ।अतिक्रमण विरुद्ध राष्ट्रिय सहमती जुटेको बेला यो विषयलाई अन्तर्राष्ट्रियस्तरमा लैजान उपयुक्त अवसर भएको नेपालीले बताउनुभयो ।
राष्ट्रिय जनमोर्चा भालुवाङको आयोजनामा भएको ‘सीमा अतिक्रमण र राष्ट्रियता’ विषयक अन्तरक्रिया कार्यक्रमलाई सम्बोधन गर्दै कार्यकारी अध्यक्ष नेपालीले इतिहासमै राष्ट्रियताका लागि देशभित्र एकमत बनेकाले अहिले यो मुद्दा अन्तर्राष्ट्रियकरण गर्न उपयुक्त मौका मिलेको बताउनुभयो ।
‘अहिले सम्पुर्ण दल, संघसंस्था र जनता सीमा अतिक्रमण विरुद्ध एकजुट भएका छन् । करिब दुई तिहाई बहुमतसहितको बलियो सरकार पनि छ’ नेपालीले भन्नुभयो, ‘यही बेलामा सीमा अतिक्रमणको विषयलाई अन्तर्राष्ट्रियकरण गर्न उपयुक्त मौका छ । यसले समस्या समाधान हुनसक्छ ।’
राजमो भालुवाङका अध्यक्ष केशवराज खनालको अध्यक्षतामा आइतबार सम्पन्न सो कार्यक्रममा जिल्ला अध्यक्ष गणेश आचार्यले अबधारणा पत्र पेश गर्नु भएको थियोे । राजमो जिल्ला सल्लाहकार रमेशमान गुरुङको स्वागत मन्तव्यबाट सुरु भएको कार्यक्रमको सञ्चालन अखिल नेपाल युवक संघका केन्द्रीय उपाध्यक्ष चित्र एमसीले गर्नु भएको थियोे ।
कार्यक्रममा राजमो राप्ती गाउँपालिका अध्यक्ष नुमानन्द वेदी, नेकपाका धर्म राज अधिकारी, नेपाली कांग्रेसका इकाई सभापति दुर्योधन पाण्डे, अखिल नेपाल किसान महासंघ केन्द्रीय कोषाध्यक्ष प्रेम नारायण आचार्य, लालमटिया गाविसका पूर्व अध्यक्ष दोर्ण भुसाल, राप्ती उद्योग वाणिज्य संघका अध्यक्ष जगत भुसाल, भालुबाङ खानेपानी उपभोक्ता समितिका अध्यक्ष हस्त गुरुङ, होटेल ब्यवसायी संघ भालुबाङका अध्यक्ष महेश रिजाल समाजसेवी हुकुम बहादुर बस्नेतलगायतले मन्तव्य व्यक्त गर्नुभएको थियो ।
लमहीमा अन्तरक्रिया
यस्तै, राजमोले सोमबार लमहीमा सोही विषयमा अन्तरक्रिया कार्यक्रम गरेको छ । नगर अध्यक्ष हरि थापाको अध्यक्षता, सल्लाहकार पदम गोराथोकीको स्वागत तथा सचिव लेखराज आचार्यले सञ्चालन गर्नु भएको कार्यक्रमा राजमोका जिल्ला अध्यक्ष गणेश आचार्यले अबधारणा पत्र प्रस्तुत गर्नुभएको थियो ।
कार्यक्रममा रक्तिम सांस्कृतिक अभियानका केन्द्रीय सल्लाहकार नारायण योगी, सत्तारुढ नेकपाका नेता वसन्त शर्मा, नेपाली कांग्रेसका कर्ण बहादुर बुढाथोकी, नेकपा (क्रान्तिकारी माओवादी)का रामचन्द्र घिमिरेले अवधारणापत्र उपर धारणा राख्नुभएको थियो ।
यस्तै, शिक्षा प्रेमी तथा बुद्धिजीवी दामोदर पाण्डे र सशिधर ज्ञवाली, सामुदायिक रेडियो प्रसारक संघ अकोरावका प्रदेश अध्यक्ष केपि घिमिरे, पत्रकार महासंघ दाङ शाखा उपाध्यक्ष लिला साह, अखिल नेपाल युवक संघका केन्द्रीय उपाध्यक्ष चित्र एमसी, पत्रकार दशरथ घिमिरे, राधेश्याम गुप्ता, दिबाकर पोख्रेल लगायतले मन्तव्य राख्नु भएको थियो ।
भारतले कालापानी, लिपुलेक र लिम्पियाधुरा लगायतका क्षेत्र अतिक्रमण गरी नयाँ नक्सा सार्वजनिक गरेपछि त्यस विरुद्ध राष्ट्रिय जनमोर्चाले देशब्यापी विरोध प्रदर्शन गर्दै आइरहेको छ । विरोध जुलुश, धर्ना, अन्तरक्रियालगायतका कार्यक्रममार्फत राजमोले सीमा अतिक्रमण फिर्ता गर्न सरकारलाई दबाब दिइरहेको छ ।
