वीरगञ्ज । पर्सामा १५ हजार मतपत्रसहित एक भारतीय नागरिक पक्राउ परेका छन् । जगरनाथपुर गाउँपालिका–२ दशौतास्थित सडकमा प्रहरीले ती भारतीय नागरिकलाई नियन्त्रणमा लिएको हो ।

पक्राउ पर्नेमा भारत बिहार राज्य पश्चिम चम्पारन नरकटिया ग्रामपंचायत–१४ ठेगाना भएका ४० वर्षीय इजाजत अहमद रहेका छन् ।

भारतबाट नेपालको दशौतातर्फ आउँदै गरेको बीआर २२ डब्लु ८००२ नम्बरको भारतीय मोटरसाइकललाई ईलाका प्रहरी कार्यालय पोखरीया र बिओपी भिखमपुर पर्साबाट खटिएको संयुक्त टोलीले जाँच गर्ने क्रममा मोटरसाइकलको पछाडीको सिटको भागमा हरियो रंगको बोरामा उक्त परिमाणको मतपत्रहरू फेला परेको प्रहरीले जनाएको छ ।

यस सम्बन्धमा प्रहरीले थप अनुसन्धान गरिरहेको छ ।