बागलुङ बजार । राष्ट्रिय जनमोर्चाका अध्यक्ष तथा बागलुङ प्रतिनिधि सभा क्षेत्र नं. १ मा वाम–लोकतान्त्रिक गठबन्धनका साझा उम्मेदवार चित्रबहादुर केसीले गठबन्धनलाई भोट नदिए देश दुर्घटनामा पर्ने बताउनुभएको छ । बागलुङ जैमिनी नगरपालिका–५ बिनामारेमा गठबन्धनले २०७९ कात्तिक २९ गते आयोजना गरेको चुनावी सभामा बोल्दै उहाँले यस्तो अभिव्यक्ति दिनुभएको हो ।
सम्बोधनको क्रममा उहाँले लोकतन्त्र, राष्ट्रियता र धर्म निरपेक्षताको रक्षाका लागि गठबन्धन बनेकाले मत दिनुपर्ने आवश्यकतामा जोड दिनुभयो । ‘यो गठबन्धन लोकतन्त्र, राष्ट्रियता र धर्म निरपेक्षताको रक्षाका लागि बनेको हो’ अध्यक्ष केसीले भन्नुभयो– ‘यदि तपाईंहरूले यो गठबन्धनलाई भोट दिनुभएन भने लोकतन्त्र, देश र धर्म निरपेक्षतामा धरापमा पर्दछ भन्ने बुझ्नुपर्दछ ।’
उहाँले गत चुनावमा नेपाली जनताले दुईतिहाइ मत दिएर पनि एमालेले पटक पटक संसद् विघटन गरेर लोकतन्त्र तथा संविधानको धज्जी उडाएको बताउनुभयो । उहाँले भन्नुभयो– ‘नेपाली जनताले दुईतिहाइ बहुमत दिएर ढुक्कसँग सरकार चलाऊ; लोकतन्त्र, राष्ट्रियता र धर्म निरेक्षताको रक्षा गर; जनताको जनजीविकाको रक्षा गर भनेका थिए तर ओलीले त कोरोनाको मध्यरातमा पटक पटक संसद् नै विघटन गरिदिए ।’
‘यसरी पटक पटक संसद् विघटन गर्ने वा संसद् अवरोध गर्नेहरूलाई फेरि हामीलाई नै भोट दिनुस् भन्न कस्तो लाज नलागेको हो ?’ उहाँले भन्नुभयो– ‘उनीहरूलाई लाग्दो हो, नेपाली जनता केही बुझ्दैनन् र फेरि पनि हामीलाई नै भोट दिन्छन् ।’ उहाँले थप्नुभयो– ‘तर नेपाली जनता त्यस्ता छैनन् । बागलुङे जनता पनि त्यस्ता छैनन् । उनीहरूले फर्की फर्की तिनै प्रतिगामीलाई भोट दिने छैनन् ।
अध्यक्ष केसीले अहिलेको चुनावमा फेरि तिनै शक्तिलाई मत दिने हो भने देश गम्भीर सङ्कटतर्फ धकेलिने दाबी गर्नुभयो । ‘पटक पटक संसद् भङ्ग गर्ने र सर्वोच्च अदालतले संसद् पुनस्र्थापना गर्ने आदेश दिएपछि पनि महिनौँसम्म संसद् अवरुद्ध गर्नेहरूलाई भोट दिनुभयो उनीहरूले के गर्छन् भन्ने त तपाईंले बुझिहाल्नुभएको छ नि’ उहाँले अगाडि भन्नुभयो– ‘उनीहरूले आफूअनुकूल संविधान संशोधन गर्छन्; आफूले चाहेका बेला जनताले चुनेको संसद् विघटन गर्छन् र नेपाललाई फेरि हिन्दु राष्ट्र बनाउँछन् अर्थात् देशलाई अँध्यारो सुरुङमा पु¥याउँछन् ।’
उहाँले यसपटक एमालेलाई भोट दिएर गल्ती नगर्न बागलुङबासीसित आग्रह गर्नुभयो । सही राजनीतिक पार्टी चुन्ने काम कहिलेकाहिँ आउने बताउँदै उहाँले मङ्सिर ४ गतेको चुनावमा देश र जनताको हितमा बनेको गठबन्धनलाई भोट दिनुपर्नेमा जोड दिनुभयो ।
जनसभामा बागलुङ १ (ख) प्रदेशसभामा नेपाली काङ्ग्रेसका उम्मेदवार डिल्लीराम सुवेदीले चित्रबहादुर केसी जस्तो राष्ट्रभक्त नेता पाएकोमा बागलुङबासी जनताले गर्व गर्नुपर्ने बताउनुभयो ।
‘हामीले चित्रबहादुर केसी जस्तो राष्ट्रभक्त नेता पाएका छौँ’ उहाँले अगाडि भन्नुभयो– ‘उहाँलाई जितायौँ भने बागलुङबासीको मात्रै होइन, सम्पूर्ण देशकै भलो हुन्छ ।’ उहाँले यसपटकको चुनावमा अध्यक्ष केसीलाई निर्वाचित गर्नमा कुनै कमजोरी गर्न नहुने बताउनुभयो ।
नेता सुवेदीले गठबन्धनलाई जिताएर मात्रै जनआन्दोलनको बलमा स्थापित लोकतन्त्र र धर्म निरपेक्षताको रक्षा हुने बताउनुभयो ।
कार्यक्रममा वामपन्थी नेता हरिकान्त शर्मा, राजमो केन्द्रीय सदस्य घनश्याम न्यौपाने, प्रतिनिधि सभामा राजमो समानुपातिक उम्मेदवार रुद्रकुमारी रोकाक्षेत्री, माओवादी केन्द्रका नेता कुशुम बुढा र कृष्ण केसी, नेपाली काङ्ग्रेसका नेता भीम श्रीस र चम्फा खड्का, एकीकृत समाजवादीका प्रकाश केसी र श्रीप्रसाद शर्मालगायतले मन्तव्य राख्नुभएको थियो ।
