काठमाडौं । राष्ट्रिय जनमोर्चाले समानुपातिक निर्वाचनमा आफ्नो पार्टीलाई भोट दिन अपील गरेको छ ।
मंगलबार एक विज्ञप्ति प्रकाशित गरी अध्यक्ष चित्रबहादुर केसीले लोकतन्त्र, गणतन्त्र र राष्ट्रियता समेतका पक्षमा लगातार र सम्झौताहीन प्रकारले सङ्घर्ष गर्दै आएको स्पष्ट पार्दै राजमोका उम्मेदवारलाई जिताउन अपील गर्नुभएको हो ।
विज्ञप्तिमा राजमोले निष्कलंक छवी प्रदर्शन गर्दै आएको पनि स्मरण गर्नुभएको छ । ’राष्ट्रिय जनमोर्चाले देश भरिको लागि समानुपातिक उम्मेद्वारहरु खडा गरेको छ । राष्ट्रिय जनमोर्चाले अहिलेसम्म, एकातिर निष्कलंक राजनीतिक चरित्रको प्रदर्शन गर्दै आएको छ भने, अर्कातिर एमसीसी, नागरिकता विधेयक समेतको विरोध गर्दै लोकतन्त्र, गणतन्त्र र राष्ट्रियता समेतका पक्षमा लगातार र सम्झौताहीन प्रकारले सङ्घर्ष गर्दै आएको छ’ अध्यक्ष केसीद्वारा जारी विज्ञप्तिमा भनिएको छ, ‘उपर्युक्त सबै कुराहरूमाथि ध्यान दिएर हामीले देशभरका सम्पूर्ण जनतासित राष्ट्रिय जनमोर्चाका समानुपातिक तर्फका सबै उम्मेदवारहरूलाई आफ्नो अमूल्य मत दिएर विजय बनाउनका लागि हार्दिक अपील गर्दछौँ ।’
राजमोले प्रतिनिधि सभामा देशैभरीबाट समानुपातिक उम्मेदवार खडा गरेको छ भने प्रदेशतर्फ प्रदेश १ र मधेश प्रदेशबाहेकका पाँचवटा प्रदेशमा उम्मेदवारहरु उठाएको छ ।
प्रत्यक्षतर्फ भने बागलुङ १ मा अध्यक्ष केसी र प्युठानमा उपाध्यक्ष दुर्गा पौडेल प्रतिनिधि सभाको उम्मेदवार हुनुहुन्छ भने अर्घाखाँची क बाट केन्द्रीय सदस्य सागर केसी लुम्बिनी प्रदेश सभाको उम्मेदवार बन्नुभएको छ । राजमो पाँचदलीय गठबन्धनमा सामेल भएका कारण अन्य क्षेत्रमा प्रत्यक्षतर्फ उम्मेदवारी दिएको छैन ।
