काठमाडौं । जथाभावी बाटो क्रस गर्ने पैदलयात्रीले पनि अब मादकपदार्थ सेवन गर्ने र ट्राफिक नियम उल्लंघन गर्नेले जस्तै ट्राफिक नियमसम्बन्धी सचेतना कक्षा लिनुपर्ने भएको छ ।
ट्राफिक सचेतना अभियान अन्तर्गत ‘ट्राफिक उज्यालो अभियान’ सञ्चालन गरिरहेको महानगरीय ट्राफिक प्रहरी महाशाखाले सोमबारदेखि जथाभावी बाटो काट्ने, आकासे पुलको प्रयोग नगर्ने र जेब्रा क्रसको वेवास्ता गर्ने पैदलयात्रीलाई ट्राफिक सचेतना कक्षा दिन सुरु गरेको हो । सोमबार मात्रै १००० जना पैदलयात्रुलाई त्यस्तो कक्षा दिइएको छ । ट्राफिक प्रहरीले समाते भने कक्षा नलिइ आफ्नो काममा पैदलयात्री जान पाउने छैनन्।
महाशाखाका प्रवक्ता प्रहरी उपरीक्षक जीवन कुमार श्रेष्ठले भने, ‘ट्राफिक नियम पालना नगरी जेब्राक्रस र आकाशे पुल प्रयोग नगर्ने पैदलयात्रीलाई ट्राफिक नियमबारे सचेतना कक्षा हाललाई भोटाहिटी र वीर अस्पताल अगाडि सञ्चालन गरेका छौँ। क्रमशः अन्य स्थानहरूमा पनि यो अभियान सञ्चालन हुनेछ।’
ट्राफिक प्रहरीले उपत्यकामा दुर्घटनामा पैदलयात्रीको धेरै ज्यान जान थालेपछि नै ‘ट्राफिक उज्यालो अभियान’ अन्तर्गत पैदलयात्री सुरक्षा अभियान नै सञ्चालन गरेको हो। यस आर्थिक वर्ष मात्रै उपत्यकामा ७६ मध्ये ३२ जना पैदलयात्रीको सवारी दुर्घटनामा ज्यान गएको छ। गत वर्ष भने २५४ मध्ये ९३ जना पैदलयात्रीको सवारी दुर्घटनामा ज्यान गएको थियो।
