तौलिहवा । जातीय समता समाजका केन्द्रीय सल्लाहकार दिलबहादुर विककी आमा भानसरा विकको निधन भएपछि शोकसभा सम्पन्न गरिएको छ ।
जातीय समता समाज जिल्ला समिति र राष्ट्रिय जनमोर्चा शिवराज नगर समितिको आयोजनामा २०७९ कात्तिक २५ गते उक्त कार्यक्रम सम्पन्न भएको हो ।
कपिलवस्तु शिवराज नगरपालिका वडा नं. ३ म धवा निवासी आमा भानसरा विकको ९३ वर्ष को उमेरमा गत कात्तिक १९ गते निधन भएको थियो । नेता दिलबहादुर विकले परम्परागत रूपमा चलिआएको काजकिरिया गर्नुभएन ।
जेठा छोरा भद्र विकको अध्यक्षतामा भएको शोकसभामा दिलबहादुर विकले आमाको जीवनी वाचन गर्दै आफू राजनीतिमा हिँड्दा आमाले कहिल्यै गुनासो नगरेकाले आफू निरङ्कुश पञ्चायती व्यवस्थादेखि नै राजनीतिमा लागेको बताउनुभयो ।
सभामा अखिल नेपाल ट्रेड युनियन महासङ्घ (अन्टुक) का केन्द्रीय सदस्य केरसिंह अदै ले परम्परागत काजकिरियाको प्रचलनबारे भौतिकवादी दृष्टिकोणबाट चर्चा गर्दै यस्तो प्रचलनमा सामेल नभएकोमा दिलबहादुर विकलाई धन्यवाद दिनुभयो ।
राजमो जिल्ला सदस्य केरसिंह पुन, समता समाजका प्रदेश सदस्य विनोद विक र लुम्बिनी प्रदेशमा राजमोका समानुपातिक उम्मेदवार कर्मराज चौधरीले शोकमन्तव्य व्यक्त गर्नुभएको शोकसभाको सञ्चालन समता समाजका जिल्ला सचिव प्रकाश विकले गर्नुभएको थियो ।
