काठमाडौं । राष्ट्रिय जनमोर्चाले ३ नं प्रदेशको नाम बागमती राख्ने निर्णयको स्वागत गरेको छ । आइतबार प्रदेश ३ को नामाकरण बागमती राख्ने निर्णयप्रति पार्टीको सहमति रहेको राजमो उपाध्यक्ष एवं प्रवक्ता दुर्गा पौडेलले एक वक्तव्यमार्फत स्पष्ट पार्नुभएको छ ।
७ वटा प्रादेशिक संरचनाको सुझाव दिएको राजमोले सातवटै प्रदेश बनेको र अहिलेसम्म नामाकरण गरिएका मध्ये तीनवटा प्रदेशको नाम आफ्नो पार्टीले दिएको सुझाव अनुसार भएको भन्दै प्रशन्नता प्रकट गरेको हो ।संघीयता विरुद्ध निरन्तर अभियान सञ्चालन गरिरहेको राष्ट्रिय जनमोर्चाले हिमाल, पहाड र तराईलाई छुने गरी सातवटा प्रशासनिक प्रदेशको प्रस्ताव गरेको थियो ।
जसको नाम सगरमाथा, कोशी, बागमती, गण्डकी, कर्णाली, लुम्बिनी र महाकाली राख्न सुझाव दिएको थियो ।
राजमोले दिएको सुझाव अनुसार २ नं प्रदेश बाहेक हिमालदेखि तराईसम्म जोडिने गरी सात प्रदेशको निर्माण र नामाकरण भएका मध्ये ३ प्रदेश बागमती, कर्णााली र गण्डकीको नाम राखिएको छ ।
यस्तो छ, वक्तव्य
“३ नंं. प्रदेशको प्रदेशसभाद्वारा उक्त प्रदेशको नाम बाग्मती राख्ने भनेर जुन निर्णय गरिएको छ, त्यसलाई राष्ट्रिय जनमोर्चाले हार्दिक समर्थन गर्दछ । जहाँसम्म त्यो प्रदेशको राजधानी हेटौडालाई राख्ने निर्णय गरिएको प्रश्न छ, त्यसबारे हामीले केही टिप्पणी गर्न चाहन्नौँ । हाम्रो पार्टीको सुरुदेखि नै यो मान्यता रहेको छ कि कुनै प्रदेशको राजनीतिको ठेगान उच्च अधिकारसम्पन्न आयोगको सिफारिसमा नै गरिनु पर्दछ । किनभने पार्टीहरूद्वारा त्यसबारे कुनै निर्णय लिदा अनावश्यक विवाद हुने सम्भावना हुन्छ ।
हाम्रो पार्टीले संघीय रूपमा प्रदेशहरूको संरचनालाई स्वीकार गर्दैन । तर प्रशासनिक इकाईको रूपमा प्रदेशहरूको निर्माणलाई अस्वीकार गर्दैन । प्रदेशहरूको सङ्ख्या निर्धारण गर्ने छलफल चल्दा हामीले ७ वटा प्रदेशहरू बन्ने प्रस्ताव राखेका थियौँ । पछि ७ वटा प्रदेशहरूको निर्माण गरियो । त्यसले हाम्रो पार्टीको सही र दुरदर्शीतापूर्ण सोचाइलाई बताउँछ ।
हामीले प्रदेशहरूको नामबारे पनि आफ्ना सुझावहरू दिएका थियौँ । हामीलाई यो कुराको प्रसन्नता छ कि, हामीले दिएका सुझावहरू मध्ये तीनवटा नामहरू सम्बन्धित प्रदेशसभाद्वारा स्वीकृत भइसकेका छन्, जस्तै कि कर्णाली प्रदेश, गण्डकी प्रदेश र अहिले बाग्मती प्रदेश । त्यस प्रकारका निर्णयहरूले पनि हाम्रो पार्टीको दूरदर्शीतापूर्ण सोचाइलाई बताउँछ । अन्तमा ३ नं. प्रदेशको नाम बाग्मती राखिएकोमा त्यो प्रदेशका सबै सांसदहरूलाई हामीले धन्यवाद दिन चाहन्छौँ ।”
