अर्घाखाँची । अर्घाखाँचीको सितगंगा नगरपालिका–६ का ८८ वर्षीय रामलाल आचार्यले राष्ट्रिय जनमोर्चा जस्तै अन्य दल पनि सिद्धान्तनिष्ठ भएको भए देशले मुहार फेर्ने बताउनुभएको छ ।
आगामी मंसिर ४ गते हुन लागेको प्रतिनिधि सभा र प्रदेश सभा निर्वाचनका लागि राष्ट्रिय जनमोर्चाका उम्मेदवारहरुलाई शुभकामना दिँदै स्थानीय बयोवृद्ध आचार्यले यस्तो बताउनुभएको हो ।
पार्टीलाई मत माग्दै घरदैलो अभियानका क्रममा उहाँको घरमा पुगेको राजमोको टोलीलाई आचार्यले पार्टीलाई अझ अगाडि बढाउन सुझाव पनि दिनुभयो ।
राजमोका पुराना शुभचिन्तक आचार्यले भन्नुभयो, ‘राष्ट्रिय जनमोर्चाको जस्तो राम्रो नीति, सिद्धान्त, विचार अरु पार्टीमा भएको भए देशले मुहार फेर्ने थियो । यो पार्टीलाई पछाडी नपारौं । विजयी बनाउँ । मेरो शुभकामना छ ।’
निर्वाचनका लागि राष्ट्रिय जनमोर्चा अर्घाखाँचीले प्रचार–प्रसारको अभियानलाई जिल्ला ब्यापी रुपमा तिब्रता दिइरहेको छ । जिल्लामा विभिन्न टोली बनाएर घर दैलो भइरहेको अभियानमा संलग्न कुवेत नेपाली एकता समाजका महासचिव खुम रायमाझीले जानकारी दिनुभयो ।
राजमोका केन्द्रीय सदस्य तथा समानुपातिक उम्मेदवार शेरबहादुर बिसीको नेतृत्वमा यतिबेला सितगंगा नगरपालिकामा घरदैलो, मतदान शिक्षा, भेटघाट, प्रचार प्रसार भइरहेको हो ।
अभियानमा मूल प्रवाह अखिल भारत नेपाली एकता समाजका उपाध्यक्ष तथा समानुपातिक उम्मेदवार कपिलदेव खनाल, कुवेत नेपाली एकता समाजका महासचिव रायमाझी, अखिल नेपाल शिक्षक संघका केन्द्रीय सदस्य हिमलाल बेलवासे, मूल प्रवाह अखिल भारत नेपाली एकता समाजका केन्द्रीय सल्लाहकार तिलकराम पाण्डे, अखिल नेपाल महिला संघका केन्द्रीय सदस्य कल्पना पोख्रेल, समानुपातिक उम्मेवाद दिलदार हुशेन, राजमो सितगंगा नगरपालिकाका नगर सदस्य नेत्रप्रसाद बेलवासे रहनु भएको छ ।
घरदैलोको क्रममा स्थानीय जनताबाट राजमोको पक्षमा उत्साहजनक सर्मथन प्राप्त भएको कुवेत एकता समाजका महासचिव रायमाझीले जानकारी दिनु भयो ।
