काठमाडौँ । नेकपा (एकीकृत समाजवादी) की केन्द्रीय सचिव तथा गुल्मी क्षेत्र नं. २ बाट प्रतिनिधि सभाकी उम्मेदवार रामकुमारी झाक्रीले आगामी चुनावलाई पश्चगमन र अग्रगमनमाझको जनमत सङ्ग्रहको सङ्ज्ञा दिनुभएको छ ।
गुल्मी निर्वाचन क्षेत्र नं. २ का प्रतिगमन विरोधी पाँच दलसम्बद्ध संयुक्त गुल्मी–काठमाडौँ सम्पर्क समितिको आयोजनामा २०७९ कात्तिक १९ गते राजधानीमा आयोजित कार्यक्रममा मन्तव्य राख्दै उहाँले यस्तो अभिव्यक्ति दिनुभएको हो ।
‘अहिलेको चुनाव सामान्य आवधिक चुनाव होइन’ उहाँले भन्नुभयो– ‘यो चुनाव त पश्चगमन र अग्रगमनमाझको चुनाव हो ।’ उहाँले यो चुनावलाई लोकतन्त्रको सवालमा इमान र बेइमानमाझको सङ्घर्षसित तुलना गर्नुभयो ।
सम्बोधनको क्रममा नेतृ झाक्रीले युगान्डाका तानाशाही पूर्व राष्ट्रपति इदि अमिनसँग नेकपा (एमाले) का अध्यक्ष केपी शर्मा ओलीको तुलना गर्नुभयो ।
‘हामीले पढेका थियौँ’ ओलीको नाम नलिइकन उनीप्रति सङ्केत गर्दै झाँक्रीले भन्नुभयो– ‘युगान्डाका तानाशाह इदि अमिन भन्ने गर्दथे, तिमी बोल्न स्वतन्त्र छौ तर बोलिसकेपछि तिम्रो सुरक्षाको ग्यारेन्टी मैले लिन्नँ ।’
‘यस्तै प्रवृत्तिले यतिखेर नेपालको लोकतन्त्र खतरामा छ’ उहाँको भनाइ थियो ।
गुल्मी क्षेत्र नं. २ (क) मा नेपाली काङ्ग्रेसका उम्मेदवार भूवनप्रसाद श्रेष्ठले मन्तव्य राख्दै प्रतिगमन विरोधी शक्तिमाझ एकता नभए २०६२–६३ सालको जनआन्दोलनद्वारा प्राप्त उपलब्धि गुम्ने अवस्था रहेको बताउनुभयो ।
उहाँले २०१७ पुस १ गते, २०५९ माघ १९ गते र २०७७ पुस ५ गतेको ओलीको कदम उस्तै उस्तै भएको भनाइ राख्नुभएको थियो ।
गुल्मी क्षेत्र नं. २ (ख) मा नेकपा (माओवादी केन्द्र) का उम्मेदवार बुद्धिबहादुर घर्तीले संविधानको रक्षा तथा प्रतिगमनलाई परास्त गर्नका लागि अहिले वाम–लोकतान्त्रिक गठबन्धन बनेको बताउँदै त्यसको विजयका लागि सबै तहतप्का लाग्नुपर्ने बताउनुभयो ।
नेपाली काङ्ग्रेसको तर्फबाट लुम्बिनी प्रदेशसभामा समानुपातिक उम्मेदवार त्रैलोक्यप्रताप सेनले समेत मन्तव्य राख्नुभएको सो कार्यक्रममा राजमो निकट सम्पर्क समितिका उपाध्यक्ष ईश्वरी शर्मालगायतको आतिथ्य रहेको थियो ।
कार्यक्रमको अध्यक्षता काङ्ग्रेसनिकट सम्पर्क समितिका सभापति कृष्णप्रसाद खरेलले गर्नुभएको थियो ।
कार्यक्रममा गठबन्धनका सयौँ नेता–कार्यकर्ताहरूको उपस्थिति रहेको थियो ।
