काठमाडौं । भारतको गुजरात राज्यको मोरबीमा झोलुङ्गे पुल चुँडिदा १४१ जनाको ज्यान गएको छ ।
आइतबार मच्छू नदीमाथिको पुल चुँडिएर दुर्घटना भएको हो । घटनामा धेरै व्यक्तिहरु नदीमा खसेका थिए । कतिपय व्यक्ति नदीमा फँसेको आशंका गरिएको छ ।
घटनालगत्तै प्रहरीले उद्धारको सुरु गरेको थियो । राति १ बजेसम्म ६८ जनाको शव निकालिएको बीबीसीले जनाएको छ । नदीमा हराइरहेका व्यक्तिको खोजी जारी छ ।
अहिलेसम्म १७७ जना मानिसको उद्धार भइसकेको समाचारमा उल्लेख छ। मृतकको संख्या अझै बढ्न सक्ने अधिकारीहरुले बताएका छन्।
दुर्घटना हुँदा सो पुलमा करिब ४०० जना रहेको अधिकारीहरुले बताएका छन् ।
झण्डै एक शताब्दी पुरानो सो पुल हालैमात्र मर्मतपछि सञ्चालनमा ल्याइएको थियो ।
तिहारपछि गुजराती नयाँवर्षको अवसरमा यो पुल खोलिएको थियो । भारतमा आइतबार सार्वजनिक बिदा परेकाले ठूलो संख्यामा मानिसहरु पुल हेर्न आएका थिए ।
पुल के कारणले खस्यो भन्नेबारे जाँचबुझ गर्न पाँच सदस्यीय समिति बनाइएको बीबीसीले जनाएको छ ।
