काठमाडौँ । नेपाल युरोपेली युनियन चलचित्र महोत्सवको एघारौँ संस्करणको काठमाडौँमा सुरु भएको छ ।
२०७९ कात्तिक ११ गते शुक्रबार साँझ चलचित्र विकास बोर्डमा आयोजित कार्यक्रममा युरोपियन युनियनकी राजदूत नोना डेप्रेजले महोत्सवको उद्घाटन गर्नुभयो ।
उहाँले महोत्सव कलाको प्रदर्शनीसँगै संस्कृति आदानप्रदानका लागि उपयुक्त माध्यम भएको भन्दै देखाइने फिल्मले युरोपलाई बुझ्ने अवसर प्रदान गर्ने जानकारी दिनुभयो ।
‘महोत्सव हाइब्रिड मोडलमा सञ्चालन हुने छ । यसलाई चलचित्र विकास बोर्डको हलमा र अनलाइन हेर्न सकिने छ’ राजदूत डेप्रेजले भन्नुभयो । उहाँले महोत्सव पहिलोपल्ट काठमाडौँबाहिर सुर्खेतमा पनि गर्न लागिएको जानकारी दिनुभयो ।
महोत्सवको सद्भावनादूत रहनुभएकी अभिनेतृ केकी अधिकारीले महोत्सवलाई सिर्जनाको पर्वको रूपमा लिने गरेको बताउनुभयो ।
उद्घाटनसँगै एक घन्टा समयावधिको रीता हुतानेनद्वारा निर्देशित “गड्स् अफ मोलेन्बेक” शीर्षकको फिल्म देखाइएको थियो । डकुमेन्ट्री श्रेणीको फिल्ममा ब्रसेल्सको मोलेनबिक क्षेत्रमा हुर्किरहेका बच्चाको आँखाबाट त्यहाँ बसोबास गरिरहेका मुस्लिम समुदायको सङ्कटलाई देखाइएको थियो ।
ब्रसेल्सको सो ठाउँलाई जिहादी उत्पादन गर्ने कारखानाका रूपमा लिने गरिएको कथा फिल्मले प्रस्तुत गरेको छ । कात्तिक १२ शनिबारदेखि १५ गतेदेखि मङ्गलबारसम्म नियमित चल्ने महोत्सवमा १३ युरोपेली र तीन नेपाली चलचित्र प्रदर्शन हुने छन् ।
सुर्खेतमा महोत्सव कात्तिक १९ देखि २२ गतेसम्म मध्यपश्चिम विश्वविद्यालयमा आयोजना गरिने छ । सुर्खेतमा पाँच युरोपियन तथा तीन नेपाली चलचित्र प्रदर्शित गरिने तालिका छ ।
