काठमाडौँ । नेपाली काङ्ग्रेसका वरिष्ठ नेता रामचन्द्र पौडेलले देशमा सुशासन दिनका लागि गठबन्धन बनाएको दाबी गर्नुभएको छ

कात्तिक ७ गते सोमवार काठमाडौँमा आयोजित प्रतिगमन विरोधी गठबन्धनको बागमती प्रदेश स्तरीय संयुक्त भेलालाई सम्बोधन गर्दै उहाँले देशलाई सुशासन दिनका लागि गठबन्धन गरिएको बताउनुभएको हो ।

उहाँले गठबन्धनको एजेन्डा सुशासन भएको उल्लेख गर्नुभयो । देशलाई आज सुशासन चाहिएको भन्दै उहाँले आफूहरू सुशासनको पक्षमा उभिएको बताउनु भयो ।

देशमा सुशासन दिने नैतिक शक्ति भएका मानिस गठबन्धनमा आबद्ध भएको उहाँको भनाइ थियो ।

वरिष्ठ नेता पौडेलले गठबन्धनको एजेन्डा लोकतन्त्र र दिगो शान्ति भएको पनि स्पष्ट पार्नुभयो ।

उहाँले भन्नुभयो– ‘चुनावी तालमेल मात्रै मैले यसलाई भन्दिनँ । यो गठबन्धन सत्ताका लागि मात्र म भन्दिनँ । यो गठबन्धन राष्ट्रको भविष्य बचाउनका लागि, सङ्घर्ष गरेर ल्याएको जनताको अधिकार बचाउनको लागि, यो मुलुकमा आएको परिवर्तनको रक्षा गर्नका लागि परिवर्तन पक्षधरको हाम्रो यो अभियान हो ।’

पाँचदलीय गठबन्धनको केन्द्रीय निर्वाचन परिचालन कमिटीका संयोजकसमेत रहनुभएका वरिष्ठ नेता पौडेलले निर्वाचनका लागि देशमा दुईओटा गठबन्धन भनेको बताउनुभयो । उहाँले बाख्रा बाख्रासित र भेडा भेडासित भने झैँ जनताको पक्ष चाहनेहरू एकातिर र प्रतिगमन चाहनेहरू अर्कोतिर भएको टिप्पणी गर्नुभयो ।

‘भन्छन् नि, बाख्रा बाख्रासित, भेडा भेडासित । राजा चाहने, प्रतिगमन चाहने, हिजोको व्यवस्था फर्काउन चाहने एकातिर । जनताको पक्ष चाहने, जनतालाई अधिकार दिलाउन चाहने, दलितलाई, पीडितलाई, शोषितलाई, उत्पीडितलाई सम्पूर्ण जनतालाई, आज महिला, पीछडिएको वर्गलाई अधिकार दिलाउन चाहाने जनताको र यो मुलुकको प्रगति चाहने, राष्ट्रियता र प्रजातन्त्र चाहने एकातिर’ उहाँले भन्नुभयो– ‘यो गठबन्धन दुईतिर छ प्रष्टैसँग ।֦

पौडेलले गठबन्धनका साझा उम्मेदवारलाई जिताउनका लागि एक स्वरमा लाग्न कार्यकर्तालाई निर्देशन दिनुभयो । देशलाई सङ्कटतर्फ धकेल्न राष्ट्रवादको मुकु्रन्डोमा छद्मभेषी राजनीति भइरहेको भन्दै उहाँले देशलाई जोगाउनका लागि आपसी सहकार्य गर्नुपर्ने बताउनुभयो ।
उहाँले विस्तृत शान्ति सम्झौता गरेदेखि नै शान्ति, लोकतन्त्र र गणतन्त्रको पक्षमा आफूहरू एकजुट भएको र एउटै विचार लिएर अगाडि बढेको बताउनुभयो ।