काठमाडौँ । नेकपा (माओवादी केन्द्र) का अध्यक्ष एवम् पूर्व प्रधानमन्त्री पुष्पकमल दाहालले हरेक १५ वर्षपछि जनतामा नैराश्यता आउनुमा राजनीतिक नेतृत्व नै दोषी रहेको बताउनुभएको छ ।

हरेक सफल क्रान्तिपछिका १०–१५ वर्षको बिचमा जनतामा नैराश्यता आउनुमा जनताको आर्थिक अवस्था र सुशासन दिन नसक्नु प्रमुख कारण रहेको उहाँको भनाइ थियो ।

अध्यक्ष दाहालले राजनीतिक आन्दोलनले देशमा ठुला परिवर्तन ल्याएको भन्दै राजनीतिक दलहरूले जनताका एजेन्डालाई प्रमुख बनाउन नसक्दा सुशासन कायम हुन नसकेको बताउनु भयो । उहाँले ठुला परिवर्तन भएको १०–१५ वर्षपछि राजनीतिक परिवर्तन र राजनीतिक एजेन्डाहरू विस्तारै कमजोर हुँदै जाने खतरा देखा पर्दै आएको उल्लेख गर्नुभयो ।

‘राजनीतिक आन्दोलनले परिवर्तनलाई ल्याएका पनि छन् । चाहे २००७ सालको कुरा गरौँ, चाहे २०४६ सालको कुरा गरौँ वा ३६ साल, २०६२–६३ सम्म आउँदाको क्रान्तिको कुरा गरौँ । यी सबै ठुला परिवर्तन सम्भव भए’ उहाँले भन्ुभयो– ‘तर ठुला परिवर्तन भएको १०–१५ वर्ष बितेपछि त्यो राजनीतिक परिवर्तन र राजनीतिक एजेन्डा बिस्तारै कमजोर हुँदै जाने खतरा देखा पर्दै आएको छ ।’

उहाँले अहिले पनि एकथरी मानिसहरू राजनीतिक दल र नेतालाई गाली गर्दै आइरहेको भन्दै उनीहरू देशलाई पुनः अन्धकारको सुरुङतिर लैजान लागिपरेको बताउनुभयो ।

‘अहिले पनि २०६२–६३ को क्रान्तिपछि नै एकथरी मानिसले पार्टी र नेतालाई गाली गर्ने र अर्कै दिशातिर अन्धकारको सुरुङतिर देशलाई लैजाने त्यस्ता मानिस छन् । निरङ्कुशता र सामन्तवादका पक्षधर छन्’ उहाँको भनाइ थियो ।

राजनीतिक परिवर्तनसँगै आर्थिक क्रान्ति, आर्थिक परिवर्तन एवम् सुशासनको प्रत्याभूति जनतालाई दिलाउन नसक्नुले देश अस्थिरतामा गइरहेको उहाँको जिकिर गर्नुभयो ।

‘राजनीतिक परिवर्तनसँगै आर्थिक क्रान्ति, आर्थिक परिवर्तन र गुड गभर्नेन्स, सुशासनको प्रत्याभूति हामीले जनतालाई दिलाउन सकेनौँ’ उहाँले भन्नुभयो– ‘सुशासनको निम्ति कर्मचारी तन्त्रमा गर्नुपर्ने सुधार, ऐन, कानुनमा गर्नुपर्ने त्यहीअनुसारका संशोधन, नयाँ ऐनकानुन बनाउने प्रक्रिया जनताको जीवनमा आर्थिक समृद्धिको यात्रा सुरु भयो भन्ने अनुभुति दिलाउने योजना र भिजन र मिसनको कमी भयो ।’

उहाँले राजनीतिक नेतृत्व क्रान्ति गर्न सिपालु भए पनि जनतालाई त्यसमा समावेश गरी क्रान्तिलाई सफल बनाउने कुरामा कमजोर रहेको बताउनुभयो ।

‘राजनीतिक नेतृत्व क्रान्ति गर्न सिपालु तर जनतालाई त्यसमा समावेश गरी क्रान्तिलाई सफल बनाउने कुरामा कमजोर भएकै हो । हामीमा त्यो इच्छाशक्ति देखिन सकेन । त्यहाँ अन्तरबिरोध भयो । त्यसकै कारणले जहिले पनि देश राजनीतिक अस्थिरतामा गयो’ उहाँले भन्नुभयो ।

अध्यक्ष दाहालले अहिलेको गठबन्धनले संविधानको रक्षा, स्थिरता र समृद्धि चाहेको बताउनु भयो । उहाँले स्थिरता र समृद्धिबिना संविधानको रक्षा हुन नसक्ने पनि जिकिर गर्नुभयो । उहाँले देशमा सुशासन कायम गर्न कर्मचारी तन्त्रमा सुधार गरी अघि बढ्न आवश्यक रहेको बताउनुभयो ।