काठमाडौँ । प्रधानमन्त्री शेरबहादुर देउवाले गठबन्धनका कारण कोही पनि राष्ट्र र राष्ट्रिय एकताको विरुद्धमा जान नसक्ने बताउनुभएको छ ।
२०७९ कात्तिक ७ गते सोमवार काठमाडौँमा आयोजित पाँचदलीय गठबन्धनको वागमती प्रदेश स्तरीय संयुक्त भेलालाई सम्बोधन गर्दै प्रधानमन्त्री देउवाले गठबन्धनका कारण कोही पनि राष्ट्र र राष्ट्रिय एकताको विरुद्ध जान नसक्ने बताउनुभएको हो ।
उहाँले देशमा कसैले प्रजातन्त्र विरोधी कार्य गर्न नसक्ने दावी गर्नुभयो । त्यस्तै, उहाँले गठबन्धन कायम रहेमा समावेशिता विरुद्ध पनि कोही जान नसक्ने बताउनुभयो ।
प्रधानमन्त्री देउवाले अहिले सङ्क्रमण कालीन समय भएकाले आपसमा झगडा गर्नु नहुने बताउनुभयो । गठबन्धनलाई टिकाएर देश विकासको बाटोमा जानुपर्ने उहाँको दावी थियिो ।
‘अहिले सक्रमण कालको अवस्था छ । अहिलेको बेला झगडा गर्ने बेला होइन । अहिले गठबन्धन टिकाउने हो’ उहाँले अगाडि भन्नुभयो– ‘त्यसपछि देशको विकासतर्फ जाने हो ।’
प्रधानमन्त्री देउवाले आफूलाई प्रधानमन्त्री बनाउनका लागि मात्रै गठबन्धन नबनेको पनि स्पष्ट पार्नुभयो । देशमा शान्ति, दह्रो लोकतन्त्र र संविधानको रक्षाका लागि गठबन्धन बनेको भन्दै उहाँले यसको अपरिहार्यता भोलि पनि रहने उल्लेख गर्नुभयो ।
